Mae Cymru'n cyflawni dros 99% o'r gyfradd lenwi wrth fod mwy a mwy o feddygon iau yn dewis hyfforddi yng Nghymru

Yn ôl data a gyhoeddwyd gan Fwrdd Recriwtio a Dethol Meddygol a Deintyddol y DU, mae Cymru wedi cyrraedd y cyfraddau llenwi uchaf ledled y DU.

Mae dros 99% o swyddi hyfforddi craidd gofal eilaidd a hyfforddiant arbenigol ledled Cymru wedi'u llenwi gan fod nifer cynyddol o feddygon iau yn cydnabod potensial Cymru fel lle rhagorol i hyfforddi, gweithio a byw ynddo.

Mae cyfanswm cyfraddau llenwi eleni o 99.30% wedi cynyddu o dros 5% o'r flwyddyn flaenorol a thros 10% o 2018.

Mae nifer y swyddi hyfforddi sydd ar gael wedi cynyddu hefyd o 415 i 428. O'r 428 hwn, dim ond tri lle na chafodd eu llenwi eleni ar draws 15 o arbenigeddau gwahanol megis hyfforddiant Llawfeddygol Craidd, Radioleg Glinigol, Offthalmoleg ac Obstetreg a Gynaecoleg, gyda 12 o arbenigeddau yn cyflawni 100%.

Mae nifer yr hyfforddai Meddygon Teulu yng Nghymru wedi cynyddu 13.5% ers y llynedd a’r gyfradd yw 58.5% ers 2018, ar y cam hwn o'r broses recriwtio. Mae hyn yn cryfhau ymhellach enw da Cymru fel lle rhagorol i hyfforddi i fod yn Feddyg Teulu.

Hyd yn hyn eleni, mae 176 o hyfforddeion Meddygon Teulu wedi cael eu recriwtio gan Addysg a Gwella Iechyd Cymru (AaGIC), a disgwylir i'r ffigur barhau i gynyddu hyd nes y caiff rowndiau recriwtio pellach eu cwblhau yn yr Hydref. Caiff hyn effaith uniongyrchol ar gynyddu nifer y meddygon teulu sy'n gofalu am gleifion ledled Cymru dros y blynyddoedd i ddod a bydd yn helpu i gyflawni ein huchelgeisiau i gryfhau ac ehangu gwasanaethau gofal sylfaenol.

Dros y blynyddoedd diwethaf, mae AaGIC wedi sefydlu nifer o fentrau i hyrwyddo Cymru fel lle gwych i hyfforddi a gweithio, gan gynnwys cyflwyno pecynnau cymell sy'n cynnwys cyllid ar gyfer un eisteddiad o arholiadau'r Coleg Brenhinol, cynyddu cyfleoedd a phroffil arbenigeddau anodd eu llenwi drwy brofiadau rhagflas a hyrwyddo arbenigeddau mewn digwyddiadau gyrfaoedd ar gyfer Hyfforddeion Sylfaen a myfyrwyr Meddygol. Mae'r cwrs Hyfforddwr Meddygon Teulu hefyd wedi cael ei ailgynllunio gan Dîm Rheoli Addysgol hyfforddiant Meddygon Teulu AaGIC.

Dywedodd yr Athro Pushpinder Mangat, y Cyfarwyddwr Meddygol yn AaGIC: "Mae'r cyfraddau llenwi hyn ar gyfer y grŵp hwn o feddygon yn dangos cynnydd parhaus yn nifer yr hyfforddeion craidd a chynnar arbenigol sy'n dewis dod i Gymru. Yr ydym yn falch iawn o fod wedi cyrraedd bron 100% eleni, a fydd yn cael effaith mor gadarnhaol ar wasanaethau gofal iechyd a chleifion yng Nghymru.

"Rydym wedi parhau i weithio gydag arbenigeddau a phartneriaid ledled Cymru, yn enwedig yn y meysydd hynny lle rydym wedi gweld swyddi gwag hirsefydlog, er mwyn gwella cyfraddau llenwi. Rydyn ni'n falch o waith caled ein timau yn y maes hwn, sy'n cael ei adlewyrchu yn y ffigurau eithriadol hyn. "

Dywedodd y Gweinidog Iechyd, Vaughan Gething: "Mae ein henw da fel lle ardderchog i hyfforddi i fod yn feddyg teulu yn tyfu ac mae'r niferoedd recriwtio diweddaraf yn dyst i hynny.

"Mae Llywodraeth Cymru wedi ymrwymo i ddarparu'r gweithlu sydd ei hangen i ddarparu system iechyd a gwasanaethau cymdeithasol sy'n fodern ac yn gynaliadwy, fel y nodir yn Cymru Iachach. Parhawn i gefnogi'r gwaith o ehangu lleoedd hyfforddi meddygon teulu yng Nghymru a thrwy ein hymgyrchoedd marchnata yr ydym bellach wedi ennill enw da fel lle rhagorol i weithwyr proffesiynol ym maes meddygaeth i Hyfforddi, Gweithio a Byw.”

DIWEDD

Nodyn i Olygyddion:

Wedi'i sefydlu ar 1 Hydref 2018, mae Addysg a Gwella Iechyd Cymru yn Awdurdod Iechyd Arbennig sy'n eistedd wrth ochr Byrddau Iechyd ac Ymddiriedolaethau o fewn GIG Cymru. Mae gennym rôl flaenllaw ym maes addysg, hyfforddi, datblygu a siapio'r gweithlu gofal iechyd, gan gefnogi gofal o ansawdd da i bobl Cymru.

Cyfraddau llenwi ar gyfer Cymru am y tair blynedd diwethaf yn ôl arbenigedd: