Cymdeithion Meddygol (PA)
Mae Cymdeithion Meddygol (PA) yn weithwyr gofal iechyd proffesiynol cyffredinol sydd wedi'u hyfforddi'n feddygol.
Mae'r dudalen hon yn dangos sut y gall Cymdeithion Meddygol helpu i leihau rhestrau aros ac oedi mewn triniaeth drwy ryddhau meddygon i helpu cleifion mwy cymhleth. Mae gennym hefyd wybodaeth i helpu sefydliadau a thimau meddygol i baratoi i integreiddio, cefnogi a datblygu rôl y Cymdeithion Meddygol, gan eu galluogi i ymarfer i'w llawn botensial.
Mae Cymdeithion Meddygol yn ychwanegiad at dimau. Nid ydynt ar draul unrhyw aelod arall o dîm gweithwyr gofal iechyd proffesiynol. Maent yn gweithio ochr yn ochr â meddygon i ddarparu gofal meddygol ar draws ystod o arbenigeddau mewn practis cyffredinol, yn y gymuned ac mewn ysbytai. Mae Cymdeithion Meddygol yn gweithio gyda goruchwyliwr meddygol penodedig ond gallant hefyd weithio'n annibynnol gyda chymorth priodol.
Cymdeithion Meddygol yng Nghymru
Ym mis Rhagfyr 2024, roedd GIG Cymru yn cyflogi dros 175 o gymdeithion meddygol ar draws 35 o arbenigeddau. Maent yn bresennol mewn naw ymddiriedolaeth/bwrdd iechyd ledled Cymru ac mae tua 40 o'r Cymdeithion Meddygol hyn yn gweithio ym maes Gofal Sylfaenol.
Rheoleiddio rôl y Cydymaith Meddygol
Ers mis Rhagfyr 2024 mae Cymdeithion Meddygol yn cael eu rheoleiddio gan y Cyngor Meddygol Cyffredinol (GMC) a gallant nawr wneud cais i ymuno â'r gofrestr. Ar gyfer Cymdeithion Meddygol sy'n ymarfer ar hyn o bryd, bydd angen iddynt ymuno â'r gofrestr erbyn mis Rhagfyr 2026. Am ragor o wybodaeth, gweler y ddolen i wefan GMC: Diweddariad ar Gymdeithion Anasthesia a Chymdeithion Meddygol.
Adolygiad Leng
Mae llywodraeth y DU wedi sefydlu adolygiad annibynnol o broffesiynau cymdeithion meddygol a chymdeithion anesthesia (AAs) yn Lloegr. Mae'r adolygiad i fod i gael ei ryddhau yn haf 2025 a bydd yn llywio polisi'r llywodraeth. Bydd hyn hefyd yn cael effaith ar PAs ac AAs yng Nghymru.
Am ragor o wybodaeth, gweler y ddolen i wefan GOV.UK: Adolygiad Leng: rhagor o fanylion am y meysydd i'w cynnwys yn yr adolygiad o broffesiynau meddygon cysylltiedig a chymdeithion meddygol anesthesia - GOV.UK
Diwrnod ym mywyd PA
Mae’r astudiaethau achos hyn yn dangos bywyd o ddydd i ddydd a phrofiadau Cymdeithion Meddygol sy’n gweithio ar draws GIG Cymru. Maent yn cynnwys manylion am y meysydd gwaith, yn ogystal ag awgrymiadau ar gyfer Cymdeithion Meddygol neu fyfyrwyr eraill.