Lleihau niwed i weithwyr y gellir ei osgoi drwy wella'r modd y cymhwysir y polisi a'r broses ddisgyblu
Cyhoeddedig: 18/03/2024
Ym mis Mawrth 2023, lansiodd Addysg a Gwella Iechyd Cymru (AaGIC) raglen waith i gefnogi sefydliadau GIG Cymru i wella’r modd y caiff eu polisïau disgyblu eu cyflawni – gan ganolbwyntio ar bwysigrwydd gofalu am yr unigolion dan sylw, yn ogystal â chymhwyso’r broses ei hun.
Roedd y rhaglen, a ddatblygwyd yn wreiddiol gan Fwrdd Iechyd Prifysgol Aneurin Bevan, AD a Gwasanaeth Lles y Cyflogeion wedi nodi gorddefnydd o'i pholisi disgyblu. Yn ei dri mis ar ddeg cyntaf, gwelodd ostyngiad o 71% yn nifer yr ymchwiliadau a gomisiynwyd ganddo, ynghyd ag arbedion cysylltiedig mewn absenoldeb salwch (3,000+ o ddiwrnodau) a chostau ariannol uniongyrchol (dros £700,000).
Mae Andrew Cooper yn Bennaeth Rhaglenni yn y Gwasanaeth Lles Cyflogeion yn BIPAB ac mae wedi bod yn gweithio gydag AaGIC i ehangu’r rhaglen ‘gwella ymchwiliadau gweithwyr’ ar gyfer sefydliadau ar draws GIG Cymru. “Mae wedi bod yn wych ymuno â thîm AaGIC i rannu’r gwaith hwn a’r effaith y gall ei gael,” meddai Andrew. “Pan ddechreuon ni, roedd y ffocws ar y niwed y gall ymchwiliadau sydd wedi’u comisiynu a’u harwain yn wael ei gael ar yr unigolyn sy’n ganolog iddyn nhw. Fodd bynnag, rydym wedi gweld yn gynyddol sut y gallant effeithio ar y rhai sy’n ymwneud ag arwain y broses, gan gynnwys rheolwyr llinell, cydweithwyr AD a chynrychiolwyr undebau.”
Ers mis Mawrth diwethaf, mae AaGIC wedi darparu hyfforddiant a fynychwyd gan gynrychiolwyr bron bob sefydliad GIG yng Nghymru ac mae hefyd wedi gweithio'n uniongyrchol gyda sefydliadau i wella eu hymagwedd yn y maes hwn o ymarfer AD. “Er y gall y broses ddisgyblu chwarae rhan bwysig wrth reoli materion yn y gweithle, rydym wedi gweld ei bod wedi cael ei defnyddio’n aml lle byddai dull mwy anffurfiol wedi bod yn fwy priodol. Mae mabwysiadu dull ‘dewis olaf’ o ddefnyddio’r polisi eisoes yn arwain at lai o niwed i weithwyr a gostyngiad mewn costau ariannol a gwastraff yn y system.”
Mae ffocws ar 'niwed i weithwyr y gellir ei osgoi' yn sail i'r gwaith, ynghyd â rhaglen ymchwil gynyddol. “Rydym wedi tynnu ar wersi o’r mudiad diogelwch cleifion i lywio’r hyfforddiant a’r dull gweithredu – gan ystyried effaith canlyniadau anfwriadol, gweithredu mewn amgylcheddau cymhleth a phwysigrwydd deall profiad y gweithiwr o’r broses,” meddai Andrew. “Mae’r rhaglen, ymgysylltu ehangach â chydweithwyr a’r ymchwil bellach yn llywio adolygiad o broses ddisgyblu GIG Cymru, a fydd yn sicrhau bod dull gweithredu llawer mwy person-ganolog yn cael ei ddefnyddio yn y dyfodol.”
“Rydym yn falch iawn o gael Andrew yn ymuno â ni yn AaGIC. Mae ei arweinyddiaeth a'r cyfeiriad y mae'n ei ddarparu ar gyfer y rhaglen hon eisoes yn gwneud gwahaniaeth gwirioneddol i'n proffesiwn pobl yn GIG Cymru,” meddai Julie Rogers, Dirprwy Brif Weithredwr AaGIC. “Mae hefyd yn helpu i ymgorffori egwyddorion arweinyddiaeth dosturiol ar draws ein gweithlu ac yn cefnogi ein ffocws ar wella cadw gweithwyr.”
Os hoffech ragor o fanylion am y rhaglen, ewch i'r hwb 'Gwella ymchwiliadau i weithwyr' ar Gwella:
Gwella Ymchwiliadau Gweithwyr - Gwella Porth Arwain AaGIC i Gymru