Blog gwestai: 'Dod o hyd i bethau cadarnhaol...' gan Kath Sheen, technegydd fferyllol

Gan Kath Sheen, technegydd fferyllol sy'n cymryd rhan yn y peilot fframwaith ymarfer uwch.

Ym mis Chwefror eleni fe’n trawyd gan Covid-19. Ar y dechrau roedd yn berwi’n dawel mewn un sosban fach – pa mor ddrwg allai un feirws fod? Faint fyddai'n effeithio arnaf? O fewn wythnosau, aeth y sgwrs am Covid-19 yn fwyfwy byrlymus tan un prynhawn ym mis Mawrth, daeth ymweliadau cartref gofal a chartrefi i ben. Roedd yr ysbyty cymunedol yr wyf i yn gweithio ynddi am ddod yn ganolfan canolbwynt Covid-19.

Roedd bywyd yn newid, nid oedd modd defnyddio gweithleoedd arferol mwyach ac felly gweithio o gartref oedd y norm. Am y chwe mis nesaf byddwn yn cael fy adleoli i weithio o bell ar gyfer rhwydwaith gofal sylfaenol ac i barhau i ymweld â'r ysbyty cymunedol a'i gefnogi.

Ar ôl gweithio mewn PCN o'r blaen, bu'n rhaid i mi ddysgu'n gyflym gyda thimau nad oeddwn wedi gweithio gyda hwy, na'u cyfarfod, o'r blaen. Anfonwyd tasgau'n uniongyrchol o feddygfeydd meddygon teulu ac yn sydyn roedd pawb o'm cwmpas yn siarad iaith wahanol. Roedd hyfforddiant yn cael ei ddarparu dros y ffôn neu drwy Microsoft Teams ac  roedd peidio â chael cydweithwyr o gwmpas i ofyn cwestiynau i chi neu ddangos i chi beth i'w wneud yn her ynddo'i hun.

Fodd bynnag, ar ôl wythnos neu ddwy, setlodd bywyd i lawr a gostegodd y storm. Roeddwn i wedi arfer mynychu cyfarfodydd Teams yn ddyddiol ac addasu'n gyflym i'r wybodaeth sy'n newid yn barhaus. Fe wnes i ddod i’r arfer o  jyglo fy lle gwaith gyda fy ngŵr a'm mab 15 oed (a orfodwyd yn 'erchyll' i symud ei annwyl Xbox i ystafell arall).

Dechreuais chwilio am y pethau cadarnhaol. Roedd gweithio o gartref yn golygu nad oedd yn rhaid i mi deithio am dri diwrnod yr wythnos, gan roi 4.5 awr ychwanegol i mi bob wythnos gartref. Roeddwn wedi cael y rhodd o amser ac nid oeddwn am ei wastraffu! Felly, penderfynais flaenoriaethu 'fi', i ddatblygu fy hun ymhellach ac i gadw i fyny â'r cyrsiau hyfforddi yr wyf wedi cofrestru arnynt.

Dewisais godi bob dydd ar yr adeg arferol a dechrau 'gweithio' pan fyddwn fel arfer yn gadael y tŷ. Gan fod digwyddiadau hyfforddi wyneb yn wyneb wedi'u newid i ddysgu ar-lein, yr oedd gennyf amser penodol wedi'i neilltuo i'w gwblhau. Dim mwy o geisio ei ffitio i mewn i'm diwrnod gwaith, yn ddiweddarach gyda'r nos o amgylch ymrwymiadau teuluol na thrwy gymryd gwyliau blynyddol. Roedd fy nghydbwysedd bywyd gwaith wedi newid er gwell.

O ganlyniad, rwyf wedi symud ymlaen drwy'r cynllun peilot cynllun peilot fframwaith ymarfer uwch ar gyfer technegwyr fferyllol (a ddatblygwyd gan Addysg a Gwella Iechyd Cymru) ac wedi manteisio'n llawn ar sesiynau mentora rheolaidd. Diolch i'r cymorth, y gefnogaeth a'r arweiniad yr wyf wedi'u cael, yr wyf ar fy ffordd i gwblhau'r rhan fwyaf o'r disgrifyddion a nodir yn y fframwaith ac yr wyf bellach yn canolbwyntio ar y rhai nad wyf wedi dangos tystiolaeth ohonynt eto.

Mae'r peilot wedi tynnu sylw at y gwaith a wnaf ac mae wedi cynyddu fy hunan hyder i wybod fy mod yn cyflawni'r meini prawf ymarfer uwch. Gallaf ganolbwyntio'n awr ar fy natblygiad personol, adolygu ble'r wyf fi, penderfynu pa lwybr yr wyf am ei deithio nesaf a sut y byddaf yn cyflawni hynny. Rwy'n lwcus iawn i weithio i sefydliad mor gefnogol ac mae fy amcanion gwerthuso ar gyfer eleni wedi'u gosod i'm helpu i gyflawni a/neu weithio yn ôl fy nodau personol fy hun yn ogystal â chyflawni gofynion fy sefydliad.

Yr wyf wedi bod wrth fy modd yn cymryd rhan yn y peilot ac yr wyf yn falch o fod wedi cael llais yn nyfodol technegwyr fferyllol.