AaGIC yn arwyddo'r Siarter Teithio Llesol

Yn ddiweddar, mae Addysg a Gwella Iechyd Cymru (AaGIC) wedi addo ei gefnogaeth i Lefel 1 y Siarter Teithio Llesol.

Drwy lofnodi’r Siarter, mae AaGIC wedi ymrwymo i gefnogi staff a’r gweithlu gofal iechyd ehangach rydym yn gweithio gyda nhw i deithio’n fwy cynaliadwy, megis cerdded, beicio, neu ddefnyddio trafnidiaeth gyhoeddus.

Mae AaGIC yn ymuno â chyrff eraill GIG Cymru sydd eisoes wedi ymrwymo i’r Siarter, gan gynnwys Bwrdd Iechyd Prifysgol Caerdydd a’r Fro, Iechyd Cyhoeddus Cymru, a Gwasanaethau Ambiwlans Cymru. Gyda’i gilydd, bydd yr ymrwymiad hwn gan gyrff cyhoeddus yn gwella iechyd a lles staff, yn lleihau llygredd aer, ac yn lleihau allyriadau carbon.

Llofnododd Arweinydd Gweithredol AaGIC ar gyfer Cynaliadwyedd, Glyn Jones, y Siarter yn swyddogol ym mis Hydref 2023 yn ystod y Gynhadledd Staff blynyddol. Dywedodd

Justine Cooper, arweinydd cynaliadwyedd AaGIC: “Mae hwn yn gam pwysig tuag at y sefydliad yn cefnogi staff gyda theithio cynaliadwy, yn enwedig o ystyried bod cymudo staff wedi'i amlygu fel un o fannau poeth carbon AaGIC. Bydd ymrwymo i’r Siarter yn ein helpu i gyrraedd ein nodau cynaliadwyedd fel y nodir yn ein Cynllun Gweithredu Cynaliadwyedd.”

Fel sefydliad, mae AaGIC eisoes yn bodloni nifer o feini prawf Lefel 1 y Siarter Teithio Llesol. Gan gynnwys mentrau megis y cynllun beicio i’r gwaith sydd ar gael i’r holl staff, mae polisi gweithio ystwyth ar waith, a seilwaith gwefru ar y safle ar gyfer cerbydau trydan. Mae’r tîm cynaliadwyedd yn datblygu cynlluniau i fodloni’r meini prawf eraill, gan gynnwys cyfrannu at fap rhyngweithiol o lwybrau teithio cynaliadwy a sefydlu rhwydwaith o hyrwyddwyr teithio cynaliadwy, dros y ddwy flynedd nesaf.

I ddarganfod mwy am weithredu ar newid hinsawdd AaGIC, ewch i'n tudalen gwe gweithredu ar newid hinsawdd.

Neu am ragor o wybodaeth am y Siarter Teithio Llesol, ewch i wefan Teithio Llesol Cymru.