Deall y Fframwaith Gallu Digidol: Dysgu ac Arweinyddiaeth
Mae’r erthygl hon yw rhandaliad cyntaf cyfres chwe rhan ar y Fframwaith Gallu Digidol (DCF). Nod y gyfres yw rhoi trosolwg o’r Fframwaith, gan dreiddio i bob un o’i meysydd i roi’r wybodaeth a’r sgiliau angenrheidiol i weithwyr gofal iechyd proffesiynol i lywio’r dirwedd ddigidol sy’n esblygu’n barhaus.
Pam y crëwyd y Fframwaith?
Mae trawsnewid digidol yn flaenoriaeth uchel i GIG Cymru. Cydnabuwyd bod bwlch sylweddol mewn iechyd a gofal cymdeithasol rhwng datblygiadau mewn technolegau gofal iechyd a gallu'r gweithlu i integreiddio'r newidiadau hyn i wasanaethau. Credir bod y bwlch hwn oherwydd llythrennedd digidol a gallu’r gweithlu, yn ogystal â heriau economaidd-gymdeithasol.
Fel rhan o Strategaeth y Gweithlu ar gyfer Iechyd a Gofal Cymdeithasol, creodd Addysg a Gwella Iechyd Cymru (AaGIC) y Fframwaith Gallu Digidol (DCF). Diben y fframwaith yw cefnogi gweithwyr gofal iechyd proffesiynol i nodi a datblygu'r sgiliau, yr agweddau a'r ymddygiadau angenrheidiol i ffynnu yn yr amgylchedd iechyd digidol.
Beth yw'r DCF?
Mae’r Fframwaith yn cynnwys chwe maes ac offeryn hunanwerthuso sy’n helpu gweithwyr gofal iechyd proffesiynol i ddeall pwysigrwydd technoleg ddigidol a nodi meysydd o ddatblygiad digidol.
Mae’r chwe maes yn darparu dull strwythuredig o nodi a datblygu’r sgiliau, yr agweddau a’r ymddygiadau angenrheidiol i ffynnu mewn amgylchedd digidol. Mae pob maes yn cynrychioli maes penodol o allu, gan ganiatáu i unigolion a sefydliadau ganolbwyntio ar agweddau penodol ar lythrennedd digidol a chymhwysedd. Y meysydd yw:
- Dysgu ac arweinyddiaeth
- Gweithio gydag eraill
- Diogelwch a lles
- Defnyddio technoleg
- Llythrennedd data
- Ymchwil ac Arloesi
Y gyntaf yn y gyfres, mae’r erthygl ragarweiniol hon yn canolbwyntio ar y maes Dysgu ac Arweinyddiaeth, ochr yn ochr â’i dri is-faes:
- Dysgu digidol
- Cefnogi eraill gyda digidol
- Arweinyddiaeth ddigidol
Gyda’i gilydd mae’r meysydd hyn yn ystyriaethau hanfodol ar gyfer meithrin llythrennedd digidol a grymuso o fewn cyd-destunau unigol a sefydliadol. Mae helpu gweithwyr gofal iechyd proffesiynol i wella eu llythrennedd digidol yn eu cefnogi i ddefnyddio offer a thechnolegau digidol yn effeithiol yn eu gwaith o ddydd i ddydd. Trwy ddatblygu galluoedd digidol, gall gweithwyr gofal iechyd proffesiynol wella gofal cleifion trwy well cydgysylltu, cyfathrebu, a mynediad at wybodaeth.
Mae'r fframwaith yn cefnogi datblygiad proffesiynol parhaus trwy ddarparu mynediad at offeryn hunanarfarnu sy'n helpu unigolion i nodi eu cryfderau a meysydd i'w gwella. Mae hyn yn grymuso gweithwyr gofal iechyd proffesiynol i gymryd perchnogaeth o’u taith trawsnewid digidol.
Dysgu ac arweinyddiaeth
Mae’r maes Dysgu ac Arweinyddiaeth yn pwysleisio pwysigrwydd aros yn gyfredol gyda thechnolegau iechyd digidol, defnyddio offer digidol yn effeithiol ar gyfer twf proffesiynol, a defnyddio technoleg i wella arferion. Yn ogystal, mae’n amlygu rôl cefnogi eraill i gael mynediad at dechnolegau iechyd digidol a’u defnyddio, gan hwyluso dysgu, a hyrwyddo arloesedd digidol o fewn sefydliadau.
Dysgu digidol
Mae dysgu digidol yn canolbwyntio ar ddatblygiad personol a phroffesiynol ym maes iechyd digidol. Mae'n amlygu pwysigrwydd cadw i fyny â'r datblygiadau diweddaraf mewn technolegau iechyd digidol. Trwy ddiweddaru gwybodaeth a sgiliau yn barhaus, gall gweithwyr proffesiynol ddefnyddio technolegau i wella eu gwaith ac annog arloesedd.
Yn ogystal, mae'r is-faes hwn yn annog defnydd effeithiol o offer digidol i wella galluoedd a hyrwyddo sgiliau digidol yn y sefydliad. Mae'n ymwneud â defnyddio technoleg i gefnogi dysgu a gwelliant parhaus.
Cefnogi eraill
Mae’r is-faes Cefnogi eraill yn canolbwyntio ar unigolion yn cyrchu a defnyddio technolegau iechyd digidol i wella llesiant. Mae’n tanlinellu pwysigrwydd defnyddio offer digidol i hwyluso dysgu ac ymgysylltu’n rhagweithiol ag addysg cyfoedion-i-gyfoedion. Trwy drosoli offer digidol, gellir creu amgylchedd dysgu mwy cynhwysol a chefnogol sy'n hyrwyddo gwelliant parhaus ac arloesedd.
Mae hefyd yn tynnu sylw at bwysigrwydd grymuso dinasyddion, cleifion a defnyddwyr gwasanaethau i gael mynediad at dechnolegau iechyd digidol a’u defnyddio, i wella eu llesiant. Mae grymuso dinasyddion, cleifion a defnyddwyr gwasanaethau â sgiliau digidol yn hollbwysig gan ei fod yn helpu i bontio’r bwlch digidol, gan sicrhau y gall pawb elwa ar ddatblygiadau technolegol beth bynnag fo’u statws economaidd-gymdeithasol. Mae'r grymuso hwn yn meithrin mwy o lythrennedd iechyd, gan alluogi unigolion i wneud penderfyniadau gwybodus am eu hiechyd a'u lles.
Arweinyddiaeth ddigidol
Mae arweinyddiaeth ddigidol yn pwysleisio sut y gall arweinyddiaeth, ar bob lefel, ysgogi mabwysiadu ac integreiddio technolegau iechyd digidol o fewn sefydliadau. Mae'r is-faes hwn yn canolbwyntio ar hyrwyddo arloesedd digidol, arwain timau ac adrannau i archwilio galluoedd digidol newydd, a meithrin diwylliant o welliant parhaus trwy dechnoleg. Trwy hyrwyddo offer ac arferion digidol, gall arweinwyr wella'r modd y darperir gwasanaethau, cefnogi datblygiad sgiliau digidol, a galluogi newidiadau trawsnewidiol mewn lleoliadau gofal iechyd. Y nod yw grymuso unigolion a sefydliadau i lywio’r dirwedd iechyd ddigidol yn hyderus ac yn effeithiol.
Eich tro chi i wneud cynnydd
Gall gwella'r gwasanaethau a ddarperir gennych trwy ddysgu mwy am offer digidol a chefnogi eraill trwy addysg cyfoedion deimlo'n frawychus.
Cam cyntaf gwych yw cwblhau offeryn hunanasesu’r Fframwaith Gallu Digidol (DCF).
Bydd yr offeryn yn eich annog i ystyried eich sgiliau digidol presennol ac mae yna hefyd adnoddau cryno ar gael i helpu i roi hwb i'ch datblygiad.
Mae'n cymryd tua awr i gwblhau'r Fframwaith a gallwch wneud hynny ar amser sy'n gyfleus i chi. Mae llawer o broffesiynau yn darparu awr o DPP ardystiedig ar gyfer ei gwblhau hefyd.
Ewch i wefan AaGIC i ddysgu mwy.