Rhaglen newydd i wella sgiliau rhagnodi fferyllwyr yng Nghymru

Published 09/04/2024

Mae’r Gymdeithas Fferyllol Frenhinol (RPS) mewn cydweithrediad ag Addysg a Gwella Iechyd Cymru (AaGIC) yn falch o gyhoeddi rhaglen ddysgu gynhwysfawr newydd wedi’i theilwra i gefnogi fferyllwyr yng Nghymru i ddarparu’r Gwasanaeth Rhagnodi Annibynnol Fferyllol (PIPS) yn hyderus.

Cynlluniwyd y rhaglen i arfogi fferyllwyr, yn bennaf mewn lleoliadau gofal sylfaenol, â'r wybodaeth, y sgiliau a'r hyder hanfodol sydd eu hangen i ddarparu gofal rhagorol i gleifion. Fodd bynnag, anogir fferyllwyr o wahanol leoliadau ymarfer hefyd i gofrestru a chymryd rhan.

Mae’r cynnwys ar gyfer pob sesiwn wedi’i ysgrifennu gan ragnodwyr fferyllol neu feddygon teulu gan ddefnyddio eu harbenigedd a’u profiad o ragnodi ac addysg a hyfforddiant. Bydd pob sesiwn yn ymchwilio i'r amodau y deuir ar eu traws yn gyffredin mewn ymarfer fferylliaeth gymunedol.

Mae nodweddion allweddol y rhaglen yn cynnwys:

Amcanion dysgu clir: Bydd cyfranogwyr yn dysgu gwneud diagnosis o gyflyrau cyffredin a mân anhwylderau, adnabod symptomau baner goch, gwybod pryd a sut i atgyfeirio cleifion i wasanaethau gofal iechyd eraill, a thrin cyflyrau cyffredin a mân anhwylderau.

Dull dysgu cyfunol: Bydd y sesiynau'n cael eu cyflwyno fel chwe gweithdy 2 awr ar wahân yn cynnwys cyflwyniadau, cwisiau gwybodaeth, gweithgareddau grŵp, trafodaethau astudiaethau achos, a sesiynau holi ac ateb gydag arbenigwyr.

Lleoliadau hygyrch: Bydd y sesiynau'n cael eu cyflwyno fel gweithdai mewn person ar draws 3 lleoliad yng Ngogledd Cymru, Canolbarth a Gorllewin Cymru, a De Cymru.

Dyluniad arbenigol: Mae’r rhaglen wedi’i dylunio gan fferyllwyr o dîm addysg a datblygiad proffesiynol RPS, sydd â chyfoeth o brofiad o ddatblygu profiadau dysgu hyblyg o ansawdd uchel sy’n canolbwyntio ar y dysgwr.

Dywedodd Elen Jones, Cyfarwyddwr Cymru yn y Gymdeithas Fferyllol Frenhinol:

“Rwy’n falch iawn i groesawu’r cydweithrediad hwn ag AaGIC a fydd yn grymuso fferyllwyr ledled Cymru i ddarparu gwasanaethau rhagnodi o ansawdd uchel i’n cymunedau.

“Rwy’n arbennig o falch o gydnabod cyfraniad amhrisiadwy fferyllwyr sy’n rhagnodi yng Nghymru wrth helpu i lunio cynnwys y rhaglen hon. Trwy gydweithio â Fferylliaeth Gymunedol Cymru, cafwyd adborth sydd wedi sicrhau ei berthnasedd a’i effeithiolrwydd wrth gyfarfod anghenion datblygiad proffesiynol fferyllwyr.

“Mae ffocws y rhaglen ar gyflyrau cyffredin a mân anhwylderau yn cyd-fynd yn berffaith â’r heriau bob dydd y mae fferyllwyr yn eu hwynebu yn eu hymarfer. Drwy roi’r wybodaeth, y sgiliau a’r hyder i fferyllwyr drin cyflyrau penodol fel rhagnodwyr, rydym nid yn unig yn gwella ansawdd gofal cleifion ond hefyd yn cryfhau rôl fferyllwyr fel aelodau hanfodol o’r tîm gofal iechyd.”

Dywedodd Margaret Allan, Deon Fferylliaeth yn Addysg a Gwella Iechyd Cymru:

“Mae Addysg a Gwella Iechyd Cymru (AaGIC) wedi ymrwymo i ddatblygu addysg a hyfforddiant ar gyfer y gweithlu fferyllol sy’n sicrhau ein bod yn cyflawni uchelgeisiau Fferylliaeth: Sicrhau Cymru Iachach.

“Trwy ein cydweithrediad â’r Gymdeithas Fferyllol Frenhinol (RPS) ar y gyfres hon o ddigwyddiadau ar gyfer fferyllwyr-rhagnodi annibynnol, rydym yn gobeithio gwella hyder mewn rhagnodi a mynediad teg i ddarpariaeth gwasanaethau rhagnodi annibynnol fferyllol ledled Cymru.”

Gellir archebu sesiynau'r rhaglen ar blatfform e-ddysgu AaGIC, Y Tŷ Dysgu.