Mae AaGIC yn hyrwyddo arweinyddiaeth dosturiol a diwylliant cynhwysol ar draws GIG Cymru
Fel rhan o'r Cynllun Tymor Canolig Integredig 2025-26, mae Addysg a Gwella Iechyd Cymru (AaGIC) wedi cyhoeddi 8 blaenoriaeth strategol i ddatblygu gweithlu medrus a chynaliadwy, gan sicrhau gofal gwell a chanlyniadau iechyd gwell i bobl Cymru.
Blaenoriaeth strategol 6: Mae Diwylliannau Tosturiol ac Arweinyddiaeth Effeithiol yn canolbwyntio ar greu amgylchedd gwaith cefnogol, cynhwysol ac dan arweiniad da.
Mae arweinyddiaeth dosturiol yn cynnwys gwrando'n fwriadol, dealltwriaeth, empathi a chefnogi pobl eraill er mwyn sicrhau bod y gweithlu'n teimlo eu bod yn cael eu gwerthfawrogi, eu parchu a'u gofalu amdanynt, fel y gallant gyrraedd eu potensial a gwneud eu gwaith gorau. Mae tystiolaeth glir bod timau sy'n ymgorffori arweinyddiaeth dosturiol yn fwy ymgysylltiedig a brwdfrydig, gan arwain at ofal o ansawdd uchel i gleifion gyda gweithlu cynaliadwy.
Rydym wedi ymrwymo i fuddsoddi yn y rhai sy'n ymgymryd â rolau arwain a rheoli er mwyn ymgorffori a chefnogi arweinyddiaeth dosturiol ar bob lefel ar draws GIG Cymru. Rydym yn parhau â'n gwaith mewn ymateb i ganlyniadau arolygon staff a data WRES. Mae'r flaenoriaeth hon hefyd yn canolbwyntio ar gadw staff, datblygu arweinwyr y dyfodol a datblygu fframwaith arweinyddiaeth a rheolaeth sy'n sail i'r gwaith hwn ar draws GIG Cymru.
Dros y tair blynedd nesaf, byddwn yn adeiladu ar raglenni presennol ac yn cydweithio â Llywodraeth Cymru i gwmpasu mentrau newydd i gefnogi'r flaenoriaeth strategol hon. Mae ein hamcanion datblygu allweddol yn cynnwys:
- Gweithredu Rhaglen Cadw Staff Cymru Gyfan i wella morâl staff a pharhad gofal i gleifion
- Cynyddu datblygiad arweinyddiaeth a rheolaeth ar gyfer rheolwyr gweithredol y GIG
- Sefydlu cod ymarfer a fframwaith cymhwysedd cenedlaethol ar gyfer arwain a rheoli yn unol â datblygiadau yn y DU
- Ehangu amrywiaeth mewn piblinellau arweinyddiaeth trwy raglenni ac adnoddau newydd
- Lansio rhaglen ymsefydlu genedlaethol a chynnig Datblygiad Proffesiynol Parhaus (DPP) i Aelodau Bwrdd GIG Cymru, gan adeiladu ar y cynllun peilot cychwynnol
"Yn AaGIC rydym yn gwybod bod arweinyddiaeth dosturiol yn hanfodol i ddarparu gofal diogel, effeithiol sy'n canolbwyntio ar y person. Mae ymgorffori arweinyddiaeth gynhwysol, sy'n cael ei harwain gan werthoedd, ar draws GIG Cymru yn hanfodol i wella lles staff, cryfhau ein gweithlu ac yn y pen draw sicrhau canlyniadau gwell i gleifion. Nid buddsoddi mewn rheolwyr ac arweinwyr yn unig yw'r camau gweithredu hyn, maent yn ymwneud â gweithio mewn partneriaeth i lunio gwasanaeth iechyd lle mae pawb yn teimlo eu bod yn cael eu parchu, eu gwerthfawrogi a'u clywed," meddai Helen Watkins, Cyfarwyddwr y Gweithlu a Datblygu Sefydliadol yn AaGIC.
Yn ogystal, bydd AaGIC yn parhau i oruchwylio a chyflwyno Arolwg Staff cenedlaethol y GIG a gweithio gyda sefydliadau iechyd i ysgogi mwy o gyfranogiad a defnydd ystyrlon o ganlyniadau.
Mae Cynllun Tymor Canolig Integredig 2025–28 Addysg a Gwella Iechyd Cymru yn cynnwys cerrig milltir clir ar gyfer y gwaith hwn, gan sicrhau ei fod yn cefnogi blaenoriaethau cenedlaethol ac anghenion lleol. Gyda ffocws parhaus ar gydweithio â Byrddau Iechyd a rhanddeiliaid ledled Cymru, mae'r sefydliad yn gosod sylfeini cryf ar gyfer dyfodol iachach a mwy cynaliadwy.
Am ragor o wybodaeth gweler ein Cynllun Tymor Canolig Integredig (IMTP) neu gysylltwch â heiw@wales.nhs.uk.
Os oes gennych ddiddordeb mewn deall mwy am ein blaenoriaethau eraill, gweler ein tudalen newyddion ar y we.