Fel corff gweithlu strategol GIG Cymru, ein cenhadaeth yw llunio gweithlu gofal iechyd medrus, cynaliadwy, a pharod ar gyfer y dyfodol sy'n darparu gofal gwell a chanlyniadau iechyd gwell i'r boblogaeth. Drwy gomisiynu a darparu addysg a hyfforddiant, rydym yn cefnogi miloedd o weithwyr gofal iechyd proffesiynol ledled Cymru—p'un a ydynt yn dechrau eu gyrfaoedd neu eisoes yn gweithio o fewn GIG Cymru.
Rydym yn trawsnewid sut mae gweithwyr gofal iechyd proffesiynol yng Nghymru yn cael eu haddysgu a'u hyfforddi. Dros y pum mlynedd diwethaf, rydym wedi ehangu'r biblinell hyfforddi, gan helpu i gyflwyno nifer record o staff newydd i'r GIG. Mae ein contractau gyda darparwyr addysg bellach yn blaenoriaethu mwy o fynediad, dysgu rhyngbroffesiynol, cynhwysiant yn y Gymraeg, ac arweinyddiaeth dosturiol.
Rydym hefyd wedi moderneiddio ein dull o addysgu a hyfforddi drwy gyflwyno ffyrdd newydd o addysgu a hyfforddi pobl. Enghraifft o hyn yw ein Hacademïau Gofal Sylfaenol a Chymunedol sy'n canolbwyntio ar gefnogi pobl sy'n gweithio mewn gwasanaethau sylfaenol a chymunedol. Rydym hefyd wedi datblygu Academi Hyfforddi Endosgopi sy'n helpu i gynyddu nifer yr endosgopyddion hyfforddedig yng Nghymru gyda chynllun i ymestyn yr Academi ledled Cymru. Ein huchelgais yw adeiladu Academi Sgiliau Clinigol fel ein bod yn defnyddio'r dull hwn i ddarparu addysg a hyfforddiant mewn meysydd sgiliau clinigol allweddol eraill. Rydym hefyd wedi adeiladu Y Tŷ Dysgu fel ein system rheoli dysgu ar gyfer Cymru sy'n darparu ffordd fodern a hygyrch o gael mynediad at addysg a hyfforddiant. Drwy ein partneriaeth â chyflogwyr y GIG a chyda Medr rydym hefyd yn cynnig llwybrau dysgu ymarferol yn y gwaith a phrentisiaethau i yrfaoedd gofal iechyd.
Er mwyn cadw i fyny â newid, dros y ddwy flynedd nesaf rydym yn datblygu, gyda phartneriaid, Strategaeth Addysg – y tro cyntaf i Gymru wneud hynny. Bydd yn helpu i ddiffinio ein dull o sicrhau bod gennym weithlu medrus a hyfforddedig sy'n gallu mynd i'r afael â heriau fel y rhai sy'n gysylltiedig â phoblogaeth sy'n heneiddio a'r arloesiadau technolegol cyflym yr ydym yng nghanol ohonynt. Bydd yn ein helpu i ymateb i newidiadau cenedlaethau sy'n effeithio ar sut mae pobl yn ymgysylltu ag addysg a hyfforddiant. Bydd y strategaeth yn llunio'r weledigaeth hirdymor ar gyfer addysgu a hyfforddi'r gweithlu gofal iechyd yng Nghymru, gan arwain ein penderfyniadau comisiynu, gyrru trawsnewidiad ar draws y system a chefnogi ein hymateb i flaenoriaethau cenedlaethol.
Bydd y strategaeth yn canolbwyntio ar nifer o feysydd allweddol:
Byddwn yn dechrau drwy asesu tirwedd gyfredol addysg gofal iechyd yng Nghymru. Mae hyn yn cynnwys:
Rydym yn gwahodd rhanddeiliaid i gyfrannu at y broses o ddatblygu strategaeth drwy gyflwyno tystiolaeth a rhannu mewnwelediadau. Bydd rhagor o fanylion ar gael yn fuan.
Byddwn yn cynnal amrywiaeth o ddigwyddiadau a chyfleoedd ymgysylltu ledled Cymru i'ch cynnwys chi yn y broses o lunio dyfodol addysg gofal iechyd. Cyhoeddir rhagor o fanylion yma yn ddiweddarach yn y gwanwyn.
Mae eich llais yn bwysig. P'un a ydych chi'n fyfyriwr, yn addysgwr, yn gyflogwr, yn weithiwr gofal iechyd proffesiynol, yn ddarparwr addysg neu'n un o'n partneriaid allweddol, bydd eich mewnwelediadau yn ein helpu i greu strategaeth addysg feiddgar a blaengar sy'n diwallu anghenion GIG Cymru nawr ac i'r dyfodol.