Neidio i'r prif gynnwy

Rhaglen Graddedigion Rheoli Cyffredinol GIG Cymru

Cyhoeddedig: 20 Ionawr 2025

Gallwch wneud cais nawr ar gyfer y Rhaglen Graddedigion Rheolaeth Gyffredinol GIG Cymru.

Mae Rhaglen Graddedigion Rheoli Cyffredinol GIG Cymru bellach ar agor ar gyfer ceisiadau ar gyfer y bedwaredd garfan o hyfforddeion rheoli (2025/27).  Mae'r rhaglen yn cynnig cyfle gyrfa unigryw a byddwn yn chwilio am arweinwyr  uchelgeisiol a all yrru rhagoriaeth trwy feddwl creadigol ac arloesol i wella'r profiad a'r iechyd i bobl Cymru. 

Mae'r rhaglen ddwy flynedd, seiliedig ar waith wedi'i chynllunio ar gyfer darpar arweinwyr GIG Cymru sydd am ddylanwadu a hyrwyddo newid i wella gwasanaethau iechyd a gofal yng Nghymru.

Fel rhan o’r rhaglen, bydd hyfforddeion yn cwblhau MSc mewn Arweinyddiaeth Iechyd Cymhwysol ac yn elwa o ddysgu ymarferol, cynllun mentora a hyfforddiant anghlinigol a fydd yn eu galluogi i ddatblygu sgiliau ym maes rheoli ac arweinyddiaeth dosturiol.

Drwy gydol y rhaglen, bydd cyfranogwyr yn ymgymryd â lleoliadau yn eu sefydliad penodedig, gan gwmpasu gofal sylfaenol ac eilaidd, yn ogystal â thimau corfforaethol.

I wneud cais, byddwch wedi cyflawni neu rhagwelir y byddwch wedi cyflawni o leiaf 2:2 mewn unrhyw ddisgyblaeth gradd a rhannu gwerthoedd GIG Cymru, ymrwymo i lwybr gyrfa gwasanaeth cyhoeddus a thaflu popeth at ddysgu cymaint â phosibl gyda ni.

Yn ôl Hyfforddai Graddedig presennol ym Mwrdd Iechyd Prifysgol Caerdydd a'r Fro, Emily McCann:

Mae'r rhaglen yn rhoi cyfle i chi ddod mewn i gysylltiad â llawer o wahanol feysydd rheoli, gan gynnig dechrau heriol ond gwerth chweil i chi i yrfa rheoli yn y GIG.  Mae yna gyfleoedd diddiwedd i ddysgu a thyfu'n bersonol ac yn broffesiynol sy'n eich galluogi i ddatblygu.  Yn bwysicaf oll, bydd y gwersi o‘ch cwrs meistr ôl-raddedig yn cysylltu'n uniongyrchol â'ch gwaith bob dydd fel y gallwch roi'r cysyniadau rydych chi'n eu dysgu ar waith".

Dywedodd Claire Monks, Rheolwr Rhaglen Graddedigion AaGIC:  “Mae creu cronfa dalent o ddarpar reolwyr yn GIG Cymru yn hollbwysig.   Drwy gyfrwng y rhaglen hon gallwn sicrhau bod darpar arweinwyr tosturiol i wasanaethu sefydliadau, mewn gwahanol rolau, ledled Cymru.  Wrth ddenu talent amrywiol o’r radd flaenaf gallwn gyfrannu at lwyddiant a ffyniant cyffredinol GIG Cymru, gan helpu i greu sylfaen gynaliadwy ar gyfer y dyfodol.

Dysgwch ragor am y rhaglen a'r broses ymgeisio.