Pentref gyrfaoedd rhithwir ar gyfer GIG Cymru yn lansio adeilad iechyd meddwl newydd
Cyhoeddwyd 18/10/2023
Heddiw (18 Hydref 2023), mae Addysg a Gwella Iechyd Cymru (AaGIC) wedi lansio adeilad Iechyd Meddwl yn Nhregyrfa i ddatgelu casgliad newydd sbon o adnoddau sy'n canolbwyntio ar yrfaoedd ar gyfer unigolion ifanc sydd â diddordeb mewn, neu'n ystyried gyrfa ym maes iechyd meddwl.
Mae Tregyrfa yn blatfform ar-lein arloesol, cwbl ddwyieithog sy'n arddangos yr ystod eang o gyfleoedd gyrfa sydd ar gael ar draws y gwahanol sectorau iechyd a gofal cymdeithasol yng Nghymru.
Gall ymwelwyr â'r pentref digidol fynd i mewn i wahanol adeiladau i gael mynediad at adnoddau ac arweiniad gyrfaoedd, gan gynnwys blogiau a flogiau gan weithwyr gofal iechyd proffesiynol, i gael mewnwelediad i sut beth yw gweithio yn y GIG a gwasanaethau iechyd a gofal ehangach.
Mae datblygiadau newydd eraill a gyhoeddwyd heddiw yn cynnwys:
- Archwiliwr Tregyrfa - mae'r daith trên rhithwir newydd hon yn caniatáu i unigolion sy'n ystyried gyrfa ym maes iechyd a gofal deithio o amgylch Tregyrfa a darganfod y cyfoeth o rolau a chyfleoedd gwaith ar draws sectorau yn GIG Cymru.
- adnoddau gyrfaoedd nyrsio wedi'u hadnewyddu – gan gynnwys cyfweliad dan arweiniad myfyrwyr gyda Sue Tranka, Prif Swyddog Nyrsio Cymru. Mae'r adnoddau newydd hyn wedi'u lleoli y tu mewn i'r adeilad Nyrsio.
- Adeilad iechyd meddwl newydd ynghyd â gardd gymunedol sy'n cynnwys adnoddau iechyd meddwl a lles i'r defnyddiwr, gan gynnwys awgrymiadau ar gyfer profi straen wrth astudio a chyfeirio at adnoddau cymorth iechyd meddwl ychwanegol.
- Flogiau newydd sy'n canolbwyntio ar yrfaoedd gan amrywiaeth o weithwyr proffesiynol perthynol i iechyd, gan gynnwys therapyddion lleferydd, ffisiotherapyddion a therapyddion galwedigaethol. Mae'r fideos hyn wedi'u lleoli y tu mewn i adeilad Gweithwyr Proffesiynol Perthynol i Iechyd.
Dywedodd Angie Oliver, Dirprwy Gyfarwyddwr y Gweithlu a Datblygu Sefydliadol yn Addysg a Gwella Iechyd Cymru:
"Mae ein digwyddiad gyrfaoedd byw ar-lein wedi'i anelu at ddysgwyr ôl-16 ac oedolion i ddysgu mwy am gyfleoedd gwaith addysgol neu yn y dyfodol gyda GIG Cymru. Bydd y digwyddiad yn cael ei recordio er mwyn i gydweithwyr ddal i fyny arno sy'n cynnwys nifer o weminarau; tynnu sylw at yrfaoedd gwahanol, ysgrifennu datganiad personol, sesiwn ar brentisiaethau a dysgu seiliedig ar waith, a sesiwn benodol ar gyfer arweinwyr gyrfa a gweithwyr proffesiynol yn unig. Rydym hefyd yn lansio ein platfform newydd Tregyrfa sydd bellach yn 3-D!
Archwiliwch Tregyrfa heddiw. Eich GIG. Eich gyrfa. Eich dyfodol.