Dywedwch eich dweud ar Fframwaith Cymhwysedd PEoLC Cymru Gyfan

Dan arweiniad Addysg a Gwella Iechyd (AaGIC), mae Cymru yn cymryd cam sylweddol ymlaen o ran gwella gofal lliniarol a gofal diwedd oes (PEoLC) gyda lansio ei Fframwaith Cymhwysedd PEoLC Cymru Gyfan cyntaf.

Mae'r broses ymgysylltu bellach ar agor a bydd yn rhedeg tan 15 Awst 2025.

Cwblhewch y ffurflen i gyflwyno eich adborth.

Mae hwn yn fframwaith amlddisgyblaethol, sy'n berthnasol i bob bwrdd iechyd, darparwr addysg, a gweithiwr proffesiynol sy'n ymwneud â PEoLC. P'un a ydych chi'n fyfyriwr, yn ymarferydd rheng flaen, neu'n arbenigwr, mae'r fframwaith hwn wedi'i gynllunio i sicrhau bod gennych chi'r sgiliau, y wybodaeth a'r hyder i ddarparu gofal tosturiol o ansawdd uchel.

Mae'r fenter hon wedi'i chynllunio i safoni a gwella sgiliau a gwybodaeth y gweithlu aml-broffesiynol sy'n darparu PEoLC ar draws pob lleoliad yng Nghymru. Mae'n cefnogi Datganiad Ansawdd Llywodraeth Cymru ar gyfer PEoLC ac yn cyd-fynd â gweledigaeth ehangach Cymru Iachach, sy'n hyrwyddo gofal iechyd integredig sy'n canolbwyntio ar y person.

Gan ffurfio rhan o IMTP 2025-2028 Addysg a Gwella Iechyd Cymru, mae fframwaith cymhwysedd PEoLC wedi'i amlygu fel galluogwr allweddol i symud GIG Cymru o ddatrys problemau gweithlu adweithiol, lleol i ddull cenedlaethol, cydlynol a rhagweithiol o gynllunio gweithlu a chynhyrchiant.

Drwy safoni cymwyseddau ar draws y gweithlu gofal lliniarol a gofal diwedd oes, mae'r fframwaith yn cefnogi ymdrechion yn uniongyrchol i wella ansawdd gofal, cynaliadwyedd y gweithlu ac effeithlonrwydd gwasanaethau, gan sicrhau cysondeb gofal cleifion o ddydd i ddydd.

Ar hyn o bryd, Cymru yw'r unig genedl yn y DU heb fframwaith cymhwysedd PEoLC cenedlaethol. Mae'r prosiect hwn yn mynd i'r afael â'r bwlch hwnnw drwy nodi cymwyseddau clir, haenog;
-Sylfaenol
-Canolradd
-Cymhleth

Mae'r cymwyseddau wedi'u teilwra i wahanol gyfrifoldebau ac arbenigedd gweithwyr proffesiynol ar draws iechyd a gofal cymdeithasol.

Mae hwn yn gyfle hollbwysig i lunio dyfodol PEoLC yng Nghymru—gan sicrhau bod gofal yn gyson, yn canolbwyntio ar y person, ac yn cael ei ddarparu gan weithlu hyderus sydd wedi'i baratoi'n dda.