Cyflwyno HALI: Grymuso gweithlu gofal iechyd Cymru gyda deallusrwydd artiffisial (AI)
Ym myd gofal iechyd sy'n datblygu ar garlam, nid yw hyder digidol bellach yn ddewisol, mae'n hanfodol. Dyna pam mae Addysg a Gwella Iechyd Cymru (AaGIC) wedi datblygu HALI, y Rhyngwyneb Dysgu AI Gofal Iechyd. Mentor sgwrsfot AI arloesol ydyw sydd wedi'i gynllunio i helpu gweithwyr gofal iechyd proffesiynol yng Nghymru i lywio cymhlethdodau deallusrwydd artiffisial (AI) gyda hyder a gallu.
Beth yw HALI?
Mae HALI yn offeryn sgwrsiol AI gwybodus, a grëwyd i gynorthwyo staff gofal iechyd i ddeall a chymhwyso technolegau AI yn ddiogel mewn lleoliadau clinigol a gweithredol. Nid sgwrsfot yn unig ydyw, mae'n fentor, yn gyfeirydd, a chydymaith dysgu wedi'i deilwra i anghenion unigryw gweithlu GIG Cymru.
Mae mynediad at HALI drwy Y Tŷ Dysgu, system rheoli dysgu genedlaethol AaGIC. Mae’n rhad ac am ddim ar y pwynt mynediad i'r gweithlu gofal iechyd yng Nghymru: https://ytydysgu.heiw.wales/
Gan weithio gyda'r partner technoleg Thinqi, mae HALI wedi'i ymgorffori'n uniongyrchol yn y system rheoli dysgu. Mae hyn yn sicrhau bod gweithwyr gofal iechyd proffesiynol yn gallu cael mynediad at hyfforddiant AI yn yr un man y maent eisoes yn ei ddefnyddio i ymgysylltu ag adnoddau datblygu proffesiynol eraill.
Ganwyd HALI o Adolygiad Tirwedd Addysg a Sgiliau AI 2025 AaGIC, a bwysleisiodd yr angen am "le diogel" lle gallai pob gweithiwr gofal iechyd brofi AI yn uniongyrchol. Mae HALI yn cyflawni'r weledigaeth hon trwy roi eglurhad o AI a meithrin ymddiriedaeth, cymhwysedd a chwilfrydedd.
Pam mae AI yn bwysig
Mae'r sector gofal iechyd yn mabwysiadu offer AI yn gynyddol ar gyfer diagnosteg, monitro cleifion, ac effeithlonrwydd gweinyddol. Fodd bynnag, mae bwlch yn parhau o ran hyfforddi staff i ddefnyddio'r offer hyn yn ddiogel ac yn effeithiol. Mae HALI yn mynd i'r afael â'r her hon drwy:
- Ddarparu canllawiau rôl-benodol ar gymwysiadau AI
- Cynnig amgylchedd diogel, rhyngweithiol i archwilio cysyniadau AI
- Helpu meithrin hyder digidol ar draws y gweithlu
- Hybu hyder y gweithlu trwy sicrhau bod AI yn cael ei ystyried fel offeryn ategol, nid yn lle arbenigedd dynol
- Gwella effeithlonrwydd trwy leihau tasgau gweinyddol sy'n golygu mwy o amser ar gyfer gofal uniongyrchol i gleifion
Model ar gyfer y dyfodol
Wrth i HALI baratoi ar gyfer ei lansiad swyddogol y mis hwn, mae'n gam beiddgar ymlaen mewn trawsnewid digidol i GIG Cymru. Y cyntaf o'i fath ar draws y pedair gwlad, mae'n fodel y gall systemau iechyd eraill edrych i'w efelychu cyn bo hir, gan gyfuno technoleg flaengar ag ymrwymiad dwfn i addysg, diogelwch, a gofal sy'n canolbwyntio ar y claf.
Mae HALI yn fwy na sgwrsfot, mae'n gatalydd ar gyfer newid a'r cyntaf o gyfres o fentoriaid AI a gynlluniwyd gan AaGIC. Trwy ymgorffori addysg AI yn nhaith ddysgu ddyddiol gweithwyr gofal iechyd proffesiynol, mae AaGIC yn sicrhau bod Cymru'n arwain y ffordd o ran darparu gofal iechyd diogel, gwybodus ac arloesol.
Dywedodd Dr Alexander Aubrey, Arweinydd Clinigol Deallusrwydd Artiffisial AaGIC a chrëwr HALI: "Mae gan AI y pŵer i drawsnewid gofal iechyd, ond dim ond os ydym yn grymuso ein gweithlu gyda'r sgiliau cywir. Drwy fuddsoddi mewn addysg AI, gallwn sicrhau bod staff GIG Cymru yn teimlo'n hyderus wrth ddefnyddio'r offer hyn - gan arwain at well gofal cleifion, gwell effeithlonrwydd, a gweithlu sydd â sgiliau digidol yn barod ar gyfer y dyfodol."