AaGIC yn lansio rhaglen gymorth i nyrsys ddeintyddol sydd newydd gymhwyso

Mae Addysg a Gwella Iechyd Cymru (AaGIC) wedi cyhoeddi lansiad menter newydd sydd wedi'i chynllunio i gefnogi Nyrsys Deintyddol sydd newydd gymhwyso wrth iddynt ymuno â'r gweithlu. Mae'r fenter yn rhan o ymrwymiad ehangach AaGIC i wella ansawdd gwasanaethau deintyddol a mynd i'r afael â heriau'r gweithlu ym maes gofal sylfaenol ledled Cymru.

Mae'r rhaglen ddwy flynedd sy'n dechrau yn Hydref 2025, yn fodel tiwtoriaeth strwythuredig wedi'i deilwra ar gyfer graddedigion Diploma y Bwrdd Arholi Cenedlaethol ar gyfer Nyrsys Deintyddol (NEBDN). Bydd y cyfnod pontio hwn yn cynnig mentora, arweiniad a phrofiadau dysgu ymarferol dan arweiniad gweithwyr proffesiynol profiadol, gan helpu nyrsys deintyddol newydd i atgyfnerthu eu gwybodaeth, sgiliau clinigol, a meithrin hyder.

"Nid yw'r fenter hon yn ymwneud â chefnogi unigolion yn unig - mae'n ymwneud â buddsoddi yn nyfodol ein gweithlu deintyddol ac, yn y pen draw, gofal cleifion," meddai Kathryn Marshall, Pennaeth Datblygu'r Gweithlu Deintyddol ar gyfer AaGIC. "Rydym yn cydnabod yr heriau sy'n dod gyda throsglwyddo o addysg i ymarfer, ac mae'r rhaglen hon yn darparu'r strwythur a'r gefnogaeth sydd eu hangen i helpu gweithwyr proffesiynol newydd i ffynnu o'r cychwyn cyntaf."

Mae'r fenter yn rhan allweddol o gynllun Gweithlu Strategol ar gyfer Gofal Sylfaenol AaGIC sy'n galw am weithlu cymhellol a gwydn. Trwy hwyluso'r trawsnewid i rolau proffesiynol, mae'r rhaglen yn hyrwyddo ymgysylltu cynnar ac yn lleihau'r risg o orweithio neu gadael ymhlith nyrsys deintyddol newydd.

Mae'r tiwtoriaeth hefyd yn atgyfnerthu blaenoriaethau strategol AaGIC:

• Datrysiadau Gweithlu Cenedlaethol: Drwy fabwysiadu dull cydgysylltiedig, Cymru gyfan o ddatblygu'r gweithlu, nod AaGIC yw symud y tu hwnt i atebion adweithiol i gynllunio mwy rhagweithiol a chynaliadwy. Mae'r fenter hon yn mynd i'r afael â bylchau hirsefydlog ac yn cefnogi twf strategol y gweithlu.
• Trawsnewid y Gweithlu :Mae'r rhaglen yn cryfhau timau cymunedol a gofal sylfaenol, gan gefnogi cleifion â chyflyrau hirdymor yn agosach at gartref a gwella gofal ataliol ar lawr gwlad.
• Addysg a hyfforddiant rhagorol: Mae'r fenter yn enghraifft o ymrwymiad AaGIC i systemau hyfforddi modern, arloesol sy'n ymateb i anghenion gweithlu'r GIG heddiw.

Mae manteision y fenter newydd hon yn ymestyn ar draws y system gofal iechyd. Bydd practisau deintyddol yn gweld gwell cydweithrediad a defnydd sgiliau o fewn eu timau. I'r gweithlu deintyddol, mae mynediad at ddatblygiad proffesiynol parhaus yn meithrin boddhad swydd ac yn gwella cadw staff—hanfodol yn wyneb heriau recriwtio parhaus y GIG.

Yn bwysicaf oll, mae cleifion yn elwa o ansawdd ac effeithlonrwydd gofal gwell. Gyda nyrsys deintyddol hyderus, â chefnogaeth dda yn y rheng flaen, gall cleifion ddisgwyl gwasanaethau mwy diogel, cyflymach a mwy tosturiol.

Mae AaGIC yn cymryd cam cadarnhaol ymlaen wrth lunio gweithlu deintyddol mwy cadarn, paratoedig a chynaliadwy yng Nghymru.

Am ragor o wybodaeth cysylltwch â Tîm Deintydd.