AaGIC yn datblygu Cynlluniau Gweithlu sy'n canolbwyntio ar y dyfodol i gryfhau GIG Cymru
Fel rhan o'r Cynllun Tymor Canolig Integredig 2025, mae Addysg a Gwella Iechyd Cymru (AaGIC) wedi cyhoeddi 8 blaenoriaeth strategol i ddatblygu gweithlu medrus a chynaliadwy, gan sicrhau gofal gwell a chanlyniadau iechyd gwell i bobl Cymru.
Blaenoriaeth Strategol 7: Mae Cynlluniau Gweithlu sy'n Canolbwyntio ar y Dyfodol yn rhaglen gynhwysfawr a blaengar sydd wedi'i chynllunio i sicrhau bod gan GIG Cymru weithlu sydd nid yn unig yn addas ar gyfer anghenion heddiw, ond sy'n barod ar gyfer y dyfodol.
O'r cychwyn cyntaf, crëwyd AaGIC i arwain dull strategol a chydgysylltiedig o ddatblygu'r gweithlu ledled GIG Cymru, ac mae'r flaenoriaeth hon yn cyflawni'r diben craidd hwnnw. Mae'n canolbwyntio ar ddatblygu a chyflawni cynlluniau'r gweithlu sy'n cyd-fynd â'r Strategaeth Gweithlu ar gyfer Iechyd a Gofal Cymdeithasol, tra hefyd wedi'i deilwra i anghenion penodol proffesiynau a gwasanaethau unigol.
Mae cynlluniau'r gweithlu, ar gyfer Gwasanaethau Iechyd Meddwl, Gwasanaethau Gofal Sylfaenol, a Genomeg yn ogystal â grwpiau proffesiynol Nyrsio, Fferylliaeth a Deintyddol, eisoes wedi dechrau trawsnewid sut rydym yn mynd i'r afael â rhai o'r heriau gweithlu cenedlaethol mwyaf ; gan eu cydnabod nid yn unig fel materion gweithredol, ond fel blaenoriaethau strategol hanfodol i lwyddiant hirdymor a chynaliadwyedd gwasanaethau iechyd a gofal. Yn fwyaf diweddar, rydym wedi cwblhau ac yn dechrau gweithredu'r Cynllun Gweithlu Amenedigol sy'n cymryd ymagwedd amlbroffesiynol sy'n canolbwyntio ar wella ansawdd a diogelwch ar draws gwasanaethau mamolaeth a newyddenedigol.
Yn ogystal, bydd AaGIC yn:
- Parhau i ddatblygu Arsyllfa Gweithlu i ddarparu mewnwelediadau amserol i dueddiadau'r gweithlu a chefnogi ymatebion amser real i heriau'r gweithlu.
- Gwella mynediad at ddata gweithlu o ansawdd uchel, gan alluogi penderfyniadau cyflymach a mwy gwybodus sydd o fudd i gleifion.
- Sefydlu Canolfan Cudd-wybodaeth y Gweithlu i gefnogi cynllunio craff, seiliedig ar dystiolaeth sy'n cryfhau darparu gwasanaethau.
- Parhau i weithredu camau gweithredu allweddol o'n holl gynlluniau gweithlu gan sicrhau bod gwasanaethau yn adlewyrchu anghenion Cymru fodern.
Dywed Helen Watkins, Cyfarwyddwr Gweithlu a Datblygu Sefydliadol
"O amseroedd aros byrrach i well parhad gofal, nid tasg y tu ôl i'r llenni yn unig yw cynllunio gweithlu - mae'n fuddsoddiad uniongyrchol mewn profiad cleifion, gwytnwch gwasanaeth, a lles staff.
"Drwy Flaenoriaeth Strategol 7, rydym yn adeiladu gweithlu GIG Cymru sy'n barod i'r dyfodol gyda chynlluniau sydd wedi'u teilwra, sy'n seiliedig ar dystiolaeth wedi'u seilio ar y Strategaeth Gweithlu genedlaethol ac wedi'u cynllunio i ddiwallu anghenion penodol gwasanaethau a phroffesiynau allweddol – pob un ohonynt yn cael effaith ddofn ar iechyd ein cymunedau."
Am ragor o wybodaeth gweler ein Cynllun Tymor Canolig Integredig (IMTP) neu gysylltwch â heiw@wales.nhs.uk.