Rhaglen Hyfforddiant Sylfaen Therapi Deintyddol Cymru - Llawlyfr Therapyddion Sylfaen

Nod Rhaglen Hyfforddiant Sylfaen Therapi Deintyddol Cymru yw darparu’r hyfforddiant a’r addysg sydd eu hangen ar Therapyddion Deintyddol i weithio mewn amgylchedd Ymarfer Deintyddol Cyffredinol.

Rhoddir pwyslais ar ddatblygiad proffesiynol parhaus drwy gydol y cwrs. Anogir y Therapydd Sylfaen i ddatblygu ac ehangu ar yr ystod o sgiliau clinigol a phersonol a ddatblygwyd wrth astudio neu weithio mewn elfennau eraill ar ddeintyddiaeth.

Yn dilyn cofrestru â’r Cyngor Deintyddol Cyffredinol, bydd ymarferydd moesegol yn sicrhau ei fod yn gwybod y diweddaraf drwy fynd i gyfarfodydd, sioeau masnach a mynd ar gyrsiau sydd ar gael drwy’r Rhaglen DCP.  

Mae Therapyddion Deintyddol yn aelodau gwerthfawr o’r tîm deintyddol, ac mae’r rôl wedi datblygu’n sylweddol mewn blynyddoedd diweddar. Maen nhw’n darparu ystod eang o wasanaethau ar gyfer cleifion, gan gynnwys cymryd radiograffau, cynllunio triniaeth, cynnal adferiadau uniongyrchol o fewn cwmpas eu hymarfer a thynnu dannedd cyntaf. 

• Cyflwyno’r Therapydd Sylfaen i Ymarfer Deintyddol Cyffredinol
• Defnyddio dulliau dysgu myfyriol i nodi meysydd cryf neu rai i’w gwella
• Sicrhau mynediad i ofal deintyddol cychwynnol o safon, a gofal deintyddol parhaus o safon, a darparu’r gofal hwnnw
• Ysgogi astudiaethau pellach
• Ennill profiad a magu dealltwriaeth o’r cysyniad o Wella Ansawdd mewn Ymarfer, gan arwain at well ofal i gleifion

Nod cyffredinol hyfforddiant WDTFT yw paratoi’r Therapydd Sylfaen ar gyfer gallu gweithio mewn amgylchedd Ymarfer Deintyddol Cyffredinol.

Ar ôl graddio a chwblhau’r ‘Rhaglen Hyfforddiant Sylfaen Therapi Deintyddol Cymru’, bydd Therapydd Sylfaen

yn meddu ar ragor o brofiad ac yn gallu gwneud y canlynol yn well:

• Ysgrifennu cynlluniau triniaeth strwythuredig ar y cyd â’r tîm ymarfer
• Asesu cyfyngiadau eu gwybodaeth a sgiliau eu hunain, a bod yn barod i geisio cymorth gan ffynhonnell briodol

hefyd, bydd wedi gwneud y canlynol:

• Caffael gwybodaeth waith trylwyr am reoliadau GDS, gan ei alluogi i ddarparu gwasanaethau deintyddol cyffredinol yn y GIG
• Caffael y sgiliau sydd eu hangen er mwyn gweithio mewn tîm deintyddol cyffredinol
• Caffael dealltwriaeth a gwybodaeth am seicoleg cleifion ynghylch triniaeth ddeintyddol

bydd hefyd yn meddu ar y canlynol:

• Deall yr angen i barhau a datblygu capasiti hunan-addysg
• Ymwybyddiaeth o’r Deddfau, Rheoliadau a’r canllawiau ynghylch ymarfer yn ddiogel ac iechyd a diogelwch yn y gweithio, gan gyfeirio’n benodol at ymbelydredd, trawsheintio a thrin deunyddiau a ddefnyddir mewn ymarfer deintyddol cyffredinol
• Ymagwedd foddhaol o ran moeseg ymarfer, a dealltwriaeth o’r angen am gyfrinachedd, gan gynnwys y Rheoliad Diogelu Data Cyffredinol a mynediad i gofnodion cleifion.

Fis Mawrth 2013, cyflwynodd y Cyngor Deintyddol Cyffredinol (GDC) bolisi mynediad uniongyrchol ar gyfer pan fydd Therapyddion Deintyddol yn gofalu am gleifion. Er hyn, ar hyn o bryd nid yw Therapyddion a Glanweithyddion Deintyddol wedi’u cynnwys ar Restr Perfformwyr Deintyddol y GIG yn y DU. Yn flaenorol, roedd Therapyddion yn darparu gofal yn dilyn atgyfeiriad gan ddeintydd. Fodd bynnag, mae’r newid i’r rheoliadau wedi golygu bod modd i gleifion gael mynediad i ofal a thriniaeth gan Therapydd Deintyddol, yn dibynnu ar faes gwaith y Therapydd. Fe ddatblygwn ddealltwriaeth o’r cyd-destun hwn drwy’r cwrs.

Bydd y canllaw hwn yn cael ei anfon atoch chi ar ôl i chi dderbyn lle ar y Rhaglen WDTFT.

Cyn dechrau yn y practis, dylech chi fod wedi gwneud y canlynol:

• Trafod a chytuno ar eich oriau gwaith gyda’ch Goruchwylydd Addysgol
• Cytuno ar ddyddiad dechrau
• Teimlo’n fodlon a rhoi sicrwydd i’ch Goruchwylydd Addysgol y byddwch yn gallu:

Bod yn bresennol yn y practis a chyrsiau ar ddiwrnodau astudio fel y’i nodir yn eich Contract

Cydymffurfio â thelerau eraill y Contract

• Llofnodi a derbyn copi o’ch Contract

Fe fyddwch chi a’ch Goruchwylydd Addysgol wedi rhoi gwybod i’r Adran Deintyddiaeth Ôl-radd am eich penodiad.

Erbyn yr adeg y bydd eich Contract yn dechrau, dylech chi fod wedi gwneud y canlynol:

• Cofrestru gyda’r Chyngor Deintyddol Cyffredinol. Gall hyn gymryd amser, felly gwnewch yn siŵr eich bod yn cofrestru cyn gynted ag sy’n bosibl – ni all therapydd ddechrau ar y Rhaglen nes y bydd wedi cofrestru.
• Bod yn aelod o gymdeithas uniondeb proffesiynol cydnabyddedig

Erbyn diwedd yr wythnos gyntaf yn y practis, dylech chi fod wedi:

• Cael mynediad i’r Portffolio Datblygu Proffesiynol
• Llenwi’r tudalennau am y Goruchwylydd Addysgol a’r dudalen manylion personol
• Cael sgwrs gychwynnol gyda’ch Therapydd Sylfaen a chwblhau’r rhestr wirio dechrau ar brofiad clinigol, a chreu cynllun gweithredu
• Derbyn copi o’r amserlen ar gyfer y diwrnodau astudio
• Cael cyflwyniad i’r ffordd y mae’r practis yn gweithio – mae hyn yn amrywio ond yn rhan bwysig iawn o’ch diwrnodau cyntaf yn y practis.

Contract

Gwnewch yn siŵr bod pob rhan o’r Contract wedi’u cytuno a’u cwblhau. Rhaid i unrhyw addasiadau, a dylai’r rhain fod yn rhai bach, gael eu llofnodi gan bob parti a’u cyflwyno i’r Deon Deintyddiaeth Ôl-radd i’w cymeradwyo.

Os ydych chi’n cytuno i dderbyn swydd, bydd fframweithiau cyfreithiol a moesegol sy’n bodoli mewn unrhyw weithdrefn recriwtio yn berthnasol i chi. Peidiwch â derbyn swydd oni bai eich bod chi’n siŵr.  

Bydd Cytundeb hyfforddiant yn cael ei lofnodi rhwng y Goruchwylydd Addysgol ac AaGIC, yn ogystal â’r Cytundeb hyfforddiant rhwng y Therapydd Sylfaen ac AaGIC.
 

Cyflog

Byddwch yn derbyn cyflog penodedig. Bydd hyn yn eich galluogi i ymdrin â chleifion heb unrhyw bwysau ariannol. Mae hyn yn wahanol i drefn ffi fesul eitem, lle mae’r cyflog yn seiliedig ar faint o waith sy’n cael ei wneud. Bydd gennych y fantais o incwm pendant ar ddiwedd y mis cyntaf yn y practis. Byddwch yn cael eich cyflogi ar gontract ffurfiol.  

Bydd eich Goruchwylydd Addysgol yn trefnu cyflog ar eich cyfer fel cyflogwr. Telir y cyflog ar Fand 6 ar y Raddfa Gyflog Agenda Newid. Bydd eich cyflog yn cael ei dalu’n fisol. Fe fyddwch yn derbyn slipiau cyflog manwl.  

Mae’r Goruchwylydd Addysgol yn gyfrifol am gyfraniadau yswiriant gwladol y cyflogwr, ac am ddidynnu yswiriant gwladol a threthi PAYE y Therapydd.

Rhaid i bob ymarferydd indemnio ei hun yn erbyn risgiau proffesiynol gyda Sefydliad Amddiffyn cydnabyddedig.

Rhaid i’r Goruchwylydd Addysgol gynnig cymorth addysgol priodol gan gynnwys caniatáu i’r Therapydd Sylfaen fynd i 10-12 o ddyddiau astudio, a chyflawni elfennau perthnasol ar y portffolio hyfforddiant. Ni ddylai’r Goruchwylydd Addysgol fynnu bod y Therapydd Sylfaen yn gweithio yn y practis ar yr adeg hon. Rhaid i’r dyddiau astudio gael eu cynnwys yn rhan o’r wythnos waith.

Rhaid i’r Therapydd Sylfaen ddilyn cyfarwyddiadau rhesymol y Goruchwylydd Addysgol. Mae hyn yn hanfodol i sicrhau perthynas broffesiynol rhwng Goruchwylydd Addysgol a Therapydd Sylfaen.

Bydd gofyn i bob practis wneud yn siŵr bod y therapydd sylfaen deintyddol yn treulio o leiaf 50% o’i amser yn cyflawni triniaeth adferol a gwneud yn siŵr bod dim mwy nag awr yn cael ei dreulio ar glaf preifat mewn dydd.

Os gwneir unrhyw waith preifat, bydd ffioedd y Goruchwylydd Addysgol yn cynyddu. Dylid rhoi eglurhad clir i’r claf ynghylch natur contract eu triniaeth.

Gwyliau

Bydd 20 diwrnod gwaith o wyliau yn berthnasol i gontract llawn amser – ar y raddfa pro rata, rydych chi’n gymwys i gael 8 diwrnod gwaith (cyfwerth â phedair wythnos ar gontract llawn amser). Bydd unigolyn ar gontract llawn yn cael 8 diwrnod o Wyliau Banc a dylid dynodi hyn ar raddfa pro rata, neu yn unol â pholisïau eich practis. (dylid gwirio hyn gyda’r practis ar ddechrau’r rhaglen).

Mae hefyd hawl i bedair wythnos o gyfnod mamolaeth/salwch PRO RATA a all gael ei ymestyn gyda chymeradwyaeth y Goruchwylydd Addysgol a Chyfarwyddwr y Rhaglen Hyfforddiant. Fel arall, bydd y gyflogaeth yn dod i ben ar unwaith.  

Dan unrhyw amgylchiadau, ni ddylid cymryd gwyliau blynyddol yn ystod diwrnodau astudio.

PETHAU PWYSIG I’W COFIO

Amser y sesiynau                9 am – 12.30 pm                 1.30 pm – 4.30 pm

Gall yr amseroedd hyn amrywio o bryd i’w gilydd

Os ydych chi’n sal, ffoniwch eich practis ar unwaith a rhowch wybod i’r Swyddog Gweinyddol WDTFT ar unwaith drwy ffonio 03300 584 219 (pwyswch 1), neu e-bostiwch Katherine.liddington@wales.nhs.uk. Salwch yw’r unig reswm dilys dros beidio â bod yn bresennol. Dylid trefnu cyfweliadau neu drefniadau personol y tu hwnt i’r amseroedd uchod.  

Sylwer, bydd y Goruchwylydd Addysgol yn cael gwybod am unrhyw achos o beidio â mynd i ddiwrnod astudio.

Nodir amser dechrau pob diwrnod astudio yn yr Amserlen. Mae’n werth cofio mai dyma’r amser y bydd y sesiwn yn dechrau, ac y bydd disgwyl i chi fod yn bresennol cyn yr amser dechrau.

Byddwch yn gallu hawlio costau teithio i ac o ddiwrnodau astudio (ar gyfer y rhai sy’n teithio o bell, gellid hawlio costau ar gyfer aros dros nos). Atodir enghraifft o ffurflen hawliadau yn Atodiad 2. Ar ddechrau’r rhaglen, bydd y Swyddog Gweinyddol yn gofyn am dystiolaeth o fanylion eich cyfrif banc er mwyn creu cyfrif i chi ar System Gyllid AaGIC, Oracle. Mae’n bwysig cyflwyno’ch hawliadau cyn gynted ag sy’n bosibl ar ôl mynd i ddiwrnod astudio. Rhaid cyflwyno derbynebau lle bo’n briodol.

Mae’r Rhaglen yn cynnwys 10-12 diwrnod astudio, fydd fel arfer yn cael eu cynnal ar ddyddiau Mercher, dydd Iau a dydd Gwener. Bwriad y Rhaglen yw helpu mewn sawl maes, yn arbennig y sgiliau clinigol a thriniaeth sydd eu hangen ar gyfer practis cyffredinol llwyddiannus.  

Nid yw strwythur y cwrs yn llym, a gall gael ei addasu i ymdrin ag unrhyw elfen sydd ei hangen arnoch chi, felly mynnwch sgwrs â Chyfarwyddwr y Rhaglen a fydd yn gweld beth sy’n bosibl i fodloni’ch gofynion.   

Mwynhewch yr hyfforddiant, fel y rhan fwyaf o bethau, po fwyaf o ymdrech rydych chi’n ei roi i mewn i’r hyfforddiant, y mwyaf y byddwch chi’n elwa arno! Mae modd datrys problemau’n gyflym, a byddant yn cael eu datrys yn gyflym os ydyn nhw’n cael eu nodi, felly siaradwch â’ch Goruchwylydd Addysgol, Cyfarwyddwr y Rhaglen Hyfforddiant neu Swyddog Gweinyddol WDTFT – maen nhw yno i’ch helpu chi!  

Dyma rai o bynciau craidd y Rhaglen Addysgol WDTFT:

• Ymsefydlu, gan gynnwys iechyd a diogelwch yn y practis
• Rheoli heintiau
• Radiograffeg a radioleg
• Adferiadau uniongyrchol
• Amddiffyn plant, gwahaniaethu o ran anabledd a diogelu
• Iechyd y Geg
• Cydsyniad
• Deddfwriaeth AGC
• Datrys anghydfod
• Cadw cofnodion clinigol
• Argyfyngau Meddygol

Gellir trafod rhai pynciau pwysig eraill, megis y canlynol:

• Sgiliau cyfathrebu
• Ymdrin â chwynion
• Gweithio mewn tîm
• Deintyddiaeth bediatreg
• Periodonteg
• Gofal deintyddol brys
• Technegau anesthetig lleol
• Argraffiadau deintyddol
• Cynllunio gyrfaoedd
• Deintyddiaeth lynol
• Llawdriniaeth yn y geg

Y Portffolio Hyfforddiant

Bydd y Portffolio ar ffurf e-bortffolio. Yn hyn o beth, rhennir manylion â chi a’ch Goruchwylydd Addysgol ar ddechrau’r Rhaglen.   

Bydd yn cynnwys manylion am driniaethau a’r gwaith a wneir, a chofnodir manylion megis nifer y cleifion a welwyd, amser ar y rhaglen addysgu, oriau gwaith ac agweddau amrywiol ar weithgareddau’r mis. Y bwriad yw cynnig profiad dysgu myfyriol, a bod o gymorth o ran hunan-reoli. Bydd y Goruchwylydd Addysgol a Chyfarwyddwr y Rhaglen Hyfforddiant yn cael mewnbwn, ond nid yw’n cael ei asesu’n grynodol. Fodd bynnag, mae’n elfen hanfodol ar y Rhaglen ac mae’n rhaid neilltuo digon o amser a sylw i’r e-Bortffolio.   

Ardystiad

Rhoddir oriau DPP ar gyfer pob diwrnod astudio a fynychir, drwy System Rheoli Dysgu AaGIC, sef y Tŷ Dysgu (sydd weithiau’n cael ei alw’n YTD).

Ar ddiwedd y penodiad, bydd y Deon Deintyddiaeth Ôl-raddedig yn cyflwyno Tystysgrif Gwblhau i’r Therapydd Sylfaen.

Gan fod Therapyddion Sylfaen yn gweithio i’w Goruchwylwyr Addysgol, mae’n rhaid didynnu treth ac yswiriant gwladol o’r cyflog.

TRETH

Os ydych wedi bod mewn gwaith yn y flwyddyn dreth hon (ar ôl 6 Ebrill), dylech chi fod wedi derbyn P45 gan eich cyflogwr blaenorol sy’n dangos y dreth rydych chi wedi’i thalu a’r cod treth. Dylid cyflwyno’r ddogfen i’r Goruchwylydd Addysgol.

Os nad oes gennych gôd treth, fe ddefnyddir cod brys ac mae’n bosibl y byddwch yn talu gormod o drethi.

Os ydych chi’n dechrau gwaith ac yn cael eich talu heb gôd treth ac yna’n derbyn cod cywir, bydd y gostyngiad treth yn berthnasol a’r cyflog misol nesaf yn llawer uwch (hynny yw, byddwch chi’n derbyn ad-daliad trethi). 

Yswiriant Gwladol

Bydd angen eich rhif Yswiriant Gwladol ar eich Goruchwylydd Addysgol. Os nad oes gennych chi rif Yswiriant Gwladol, cysylltwch â’r Asiantaeth Gyfraniadau.

Fe fyddwch chi’n talu cyfraniadau Yswiriant Gwladol Dosbarth 1 ar raddfeydd contractwyr allanol.

Slipiau Cyflog

Dylech dderbyn slipiau cyflog manwl yn dangos yr holl ddidyniadau misol. Os oes gennych unrhyw ymholiadau am eich cyflog a’ch hawliadau, trafodwch â’ch Goruchwylydd Addysgol neu reolwr y gyflogres yn y practis yn y cam cyntaf. Gall Cyfarwyddwr y Rhaglen Hyfforddiant ymdrin â’r holl ymholiadau sy’n weddill. Byddwn yn cyfeirio at gyngor arbenigol os na allwn ateb cwestiynau neu ddatrys problemau Therapyddion Sylfaen am Drethi neu Yswiriant Gwladol.

Fis Ebrill 2019, cyhoeddodd Llywodraeth Cymru argyfwng hinsawdd yng Nghymru, a dwy flynedd wedyn cyhoeddwyd ei chynllun ar gyfer GIG “sero net” erbyn 2030. Mewn ymateb i’r addewid hon, cyhoeddwyd Cynllun Cyflawni Strategol Datgarboneiddio GIG Cymru.

Cynllun Cyflenwi Strategol Datgarboneiddio GIG Cymru (llyw.cymru)

Mae gan Addysg a Gwella Iechyd Cymru (AaGIC) ran i’w chwarae o ran cefnogi gweithrediad y cynllun hwn, ond gallwn ni i gyd chwarae rhan yn hyn o beth.

Disgrifia’r Lancet newid hinsawdd fel “y bygythiad iechyd byd-eang mwyaf y mae’r byd yn ei wynebu yn y 21ain ganrif”.

Gall meddwl am newid hinsawdd fod yn frawychus (mae hyn yn ymateb normal i newyddion drwg; gelwir hyn yn eco-drallod). Gall cydnabod sut ry’n ni’n teimlo, a sut ry’n ni’n gweithredu, wneud inni deimlo’n fwy positif.

Dyma rai camau bach y gallwch chi eu rhoi ar waith:

• Ymuno â’ch Grŵp Gwyrdd lleol (mae un ar gael ymhob Bwrdd Iechyd)
• Edrych ar yr adnoddau sydd ar gael ar wefan Iechyd Gwyrdd Cymru
• Ymchwilio i opsiynau teithio llesol er mwyn cymudo i’r gwaith neu rannu car ar gyfer diwrnodau astudio.
• Dod â mwg/potel ddŵr ailddefnyddiadwy i ddiwrnodau/sesiynau astudio.
• Lleihau’r defnydd o bapur, oherwydd bydd yr holl gynnwys addysgol, amserlenni ac agendau ar gael ar ffurf digidol neu drydanol.  

• Mae deintyddiaeth yn wynebu heriau mawr yn helpu i daclo’r broblem, yn enwedig ynghylch dadhalogi, gwaredu gwastraff a’r defnydd o blastigau untro. Mae allyriadau gwasanaethau deintyddol y GIG yn cynrychioli 3% o ôl-troed carbon cyffredinol y GIG.

  Os oes gennych ddiddordeb mewn dysgu mwy am Gynaliadwyedd ym maes Deintyddiaeth, cliciwch y ddolen isod i gael mynediad i adnodd arbennig ar wefan y Ganolfan Gofal Iechyd Cynaliadwy.

  Sustainable Dentistry: How-to Guide for Dental Practices | Centre for Sustainable Healthcare

  Mae Gofal Iechyd Cynaliadwy yn darparu gobaith ar gyfer dyfodol a phlaned iachach.

  Dyna pam mae’r Lancet hefyd yn disgrifio newid hinsawdd fel “y cyfle mwyaf i ailddiffinio penderfynyddion cymdeithasol ac amgylcheddol iechyd”.  

Prif leoliad y cwrs yw’r Uned Deintyddiaeth Ôl-radd yn Ysbyty’r Tywysog Charles, Merthyr Tudful. Lleolir yr Uned yng nghefn y prif adeilad, ger mynedfa’r uned famolaeth. Mae arwydd y tu allan i’r adeilad (Uned 3), yn dynodi lleoliad yr Uned Ôl-radd. Mae nifer o feysydd parcio mawr ar y safle a’r rheiny am ddim.

Mae yna siop goffi a ffreutur yn yr ysbyty a’r ddau’n cynnig lluniaeth.

Mae gan yr Adran Ddeintyddiaeth Ôl-radd sawl cyfleuster sy’n cael eu defnyddio’n rheolaidd ar gyfer Hyfforddiant Sylfaen Deintyddol a Hyfforddiant Craidd Deintyddol, yn ogystal ag amrywiaeth helaeth o gyrsiau a addysgir a chyrsiau ymarferol ar gyfer yr holl dîm deintyddol. Mae gennym gyfleusterau cyfrifiadurol a hyd at ddeuddeg o fodelau deintyddol gyda darlithfeydd llawn offer a chyfleusterau fideogynadledda. Ceir llyfrgell gynhwysfawr ar y safle ac mae croeso i Therapyddion Sylfaen fenthyg unrhyw lyfrau a’r offer sain/gweledol sydd ar gael. Rydym yn annog pob Goruchwylydd Addysgol a Therapyddion Sylfaen i ddefnyddio’r cyfleusterau hyn drwy’r flwyddyn – gofynnwch i Gyfarwyddwr y Rhaglen Hyfforddiant am argaeledd.

Cynhelir nifer o ddiwrnodau astudio ar lwyfannau ar-lein lle bo hynny’n briodol.

Sylwer, bydd Canolfannau Ôl-radd eraill yn cael eu defnyddio ar gyfer diwrnodau astudio, megis yr Ysbyty Deintyddol, Parc y Mynydd Bychan, Caerdydd neu Ysbyty Llandochau, ynghyd â lleoliadau eraill.

TREFNIADAU PARCIO YN LLANDOCHAU

Mae dau opsiwn ar gael i chi:

1.         Parcio a Theithio
Mae gwasanaeth Parcio a Theithio ar gael o Fae Caerdydd, gyda gwasanaeth bws am ddim rheolaidd i ac o’r ysbyty. Mae’n gweithio’n dda hyd yma.

MAE’N DEBYG Y BYDDAI HYN YN HAWS GAN FOD PARCIO AR Y SAFLE YN DOD YN DRAFFERTHUS. DOES DIM ANGEN COFRESTRU AR GYFER Y GWASANAETH.  

2.         Parcio ar y Safle
Mae cyfleusterau parcio ar safle UHL yn cael ei fonitro’n agos gan Parking Eye gan ddefnyddio system gamera Adnabod Rhif Cofrestru Cerbyd Awtomataidd (ANPR). Mae’r rheoliadau’n cael eu gweithredu’n llym a bydd cosbau os nad yw’r rhain yn cael eu dilyn. Fodd bynnag, ni ddylech wynebu problem os byddwch yn cofrestru i ddefnyddio’r meysydd parcio STAFF ymlaen llaw ar ddiwrnod y cwrs. I wneud hyn, e-bostiwch Parking Eye: uhl@parkingeye.co.uk gan gopïo CAV_UHB.parking.office@wales.nhs.uk yn y neges.  Rhowch “Cronfa Ddata UHL” fel Pwnc eich e-bost. Dyma fap o’r meysydd parcio. Cofiwch ddefnyddio eich cyfeiriad e-bost GIG wrth ysgrifennu at Parking Eye.

Nodwch rif cofrestru eich cerbyd, nodwch y dyddiad y byddwch chi’n mynychu’r cwrs (ac enw’r cwrs) a gofynnwch i gael manylion eich car wedi’i ychwanegu i’r gronfa ddata ar gyfer y diwrnod hwnnw drwy ddefnyddio’r testun canlynol: “A fyddech cystal ag ychwanegu Rhif Cofrestru’r Cerbyd canlynol i’r Gronfa Ddata UHL ar gyfer dydd Gwener, 30 Mehefin 2023”.

Peidiwch â defnyddio Maes Parcio 8 (sydd ar gyfer staff yn unig), nac ychwaith y meysydd parcio ar gyfer cleifion/ymwelwyr oherwydd mae gan rhain gyfyngiad amser pedair awr. Hefyd, peidiwch â pharcio yn y maes parcio i breswylwyr y tu ôl i’r Ganolfan Addysg.

Nid yw’r Ganolfan Addysg yn derbyn cyfrifoldeb am unrhyw gosbau i fynychwyr oherwydd methu â chydymffurfio gyda rheoliadau Parking Eye. Mae’r cynllun safle atodedig yn dangos y Ganolfan Addysg, sef yr adeilad brics coch mawr ar y dde wrth i chi yrru drwy’r gât fawr i’r safle (17 ar y cynllun safle). Mae’r cynllun hwn hefyd yn dangos y meysydd parcio sydd heibio ein hadeilad ni ar y safle.

COFIWCH ADAEL DIGON O AMSER I GERDDED YN ÔL I’R GANOLFAN YN OGYSTAL Â PHARCIO.

CYFLEUSTERAU’R YSBYTY
Gallwch brynu cinio a lluniaeth yn y prif ysbyty mewn bwyty, siop goffi a chiosg yn yr adran cleifion allanol.

Gweinyddwr y Cwrs
Addysg Feddygol a Deintyddol, Canolfan Academaidd Routledge
Ysbyty Llandochau, Heol Penlan
Penarth CF64 2XX    
Ffôn: 029 2071 6342 
jayne.davies7@wales.nhs.uk