Data a deallusrwydd y gweithlu
Fel sefydliad gweithlu strategol GIG Cymru, mae gennym rôl Cymru gyfan o ran strategaeth, cynllunio a deallusrwydd y gweithlu.
Rydym yn troi data'r gweithlu yn dystiolaeth a mewnwelediad i helpu GIG Cymru i ddeall ei weithlu, rhagweld pwysau yn y dyfodol a gwneud penderfyniadau sy'n seiliedig ar ddata ynghylch cynllunio'r gweithlu, comisiynu addysg, hyfforddiant a buddsoddi.
Gyda chefnogaeth mewnwelediad lleol, rydym yn gweithio gyda Llywodraeth Cymru, sefydliadau GIG Cymru, darparwyr addysg, cyrff proffesiynol a phartneriaid cenedlaethol i ddarparu golwg genedlaethol ar gyflenwad y gweithlu, piblinellau addysg a hyfforddiant, tueddiadau'r gweithlu a risgiau sy'n dod i'r amlwg.
- Darllenwch ein Hadroddiad Tueddiadau'r Gweithlu blynyddol
- Ewch i'n Harsyllfa Gweithlu
Sut mae ein deallusrwydd yn cefnogi penderfyniadau'r gweithlu
Ein deallusrwydd ar wait
Mae'r enghreifftiau hyn yn dangos sut mae ein deallusrwydd yn cefnogi cynllunio gweithlu a phenderfyniadau ynghylch addysg, hyfforddiant a chyflenwad gweithlu yn y dyfodol.
Mae ein dadansoddiad piblinell hyfforddeion meddygon teulu yn cysylltu gwybodaeth addysg a hyfforddiant â data cyflogaeth dilynol. Mae'n rhoi mewnwelediad i ddilyniant, cadw a chyfraniad hyfforddiant at gyflenwad gweithlu yn y dyfodol. Mae hefyd yn dangos sut y gall data cysylltiedig wella dealltwriaeth o lwybrau a chanlyniadau'r gweithlu.
Mae ein gwaith mewn gwasanaethau amlawdriniaethol, mamolaeth a newyddenedigol yn dwyn ynghyd y data sydd ar gael a mewnwelediad proffesiynol i nodi risgiau ac amrywiadau yn y gweithlu a llywio cynllunio gwasanaethau a’r gweithlu.
Rydym yn casglu ac yn dadansoddi data Arolwg Staff GIG Cymru ac, eleni, byddwn yn casglu data Arolwg Staff Gofal Sylfaenol. Mae'r ddau yn ffynonellau pwysig o fewnwelediad ar gyfer Safon Cydraddoldeb y Gweithlu (WES). Mae dangosfwrdd WES yn cefnogi adrodd cenedlaethol ac yn helpu sefydliadau'r GIG i nodi gwahaniaethau cydraddoldeb fel y gellir cymryd camau i fynd i'r afael â nhw.
Mae ein deallusrwydd yn llywio'r Cynllun Addysg a Hyfforddiant GIG Cymru, gan ddod â modelu, gwybodaeth piblinell hyfforddiant a dadansoddi'r gweithlu at ei gilydd i gefnogi penderfyniadau comisiynu addysg yng nghyd-destun galw cyfredol y gweithlu, y cyflenwad yn y dyfodol a rhagolygon cyflogaeth graddedigion.
Edrych tua’r dyfodol
Ein blaenoriaeth yw gwella cyflawnrwydd, cysondeb a chysylltiad data presennol, gan gryfhau mewnwelediad i symudiad y gweithlu, sgiliau, llwybrau gyrfa, swyddi gwag, sefydlu a chofrestru proffesiynol.
Bydd deallusrwydd sydd wedi'i gysylltu'n well yn helpu GIG Cymru i ddeall cyflenwad y gweithlu, asesu canlyniadau tymor hwy buddsoddiad mewn addysg a hyfforddiant, modelu senarios yn y dyfodol a nodi ymyriadau effeithiol. Bydd hefyd yn helpu partneriaid i ystyried gwerth a chynaliadwyedd gwahanol ddulliau gweithlu.
Mae hyn yn cefnogi'n uniongyrchol Cenhadaeth Pedwar o'n Strategaeth Ddigidol a Data 2023-2028: darparu galluoedd data effeithiol a diogel sy'n gyrru mewnwelediad, deallusrwydd a gwelliant gweithredadwy.