Gweinyddiaeth
Mae staff gweinyddol y GIG yn darparu cymorth busnes i staff clinigol ac anghlinigol. Mae’n rhaid i’r GIG fod yn drefnus iawn a chadw cofnodion manwl o gleifion a staff.
Mae’n rhaid i gleifion a sefydliadau eraill allu cysylltu â’r GIG, ynghyd â gallu siarad â’r person iawn neu fynd i’w weld er mwyn cael yr help sydd ei angen. Gall hyn gynnwys trefnu apwyntiad, dod o hyd i gyngor neu dalu anfoneb.
Mae rolau gweinyddol yn cynnwys:
- Cynorthwyydd Personol
- Derbynnydd
- Clerc Ward
- Gweithredwr ffôn/switsfwrdd
- Ysgrifennydd/teipydd
- Staff cofnodion iechyd neu feddygol
Bydd rhaid bod gennych chi sgiliau rhifedd a llythrennedd da ar gyfer unrhyw rôl weinyddol. Fel arfer bydd cyflogwyr yn gofyn am gymwysterau TGAU (neu gymwysterau cyfatebol) mewn Saesneg a Mathemateg. Bydd sgiliau a chymwysterau TG yn ddefnyddiol hefyd gan fod cynifer o systemau’r GIG yn seiliedig ar TG erbyn hyn. Byddwch chi’n defnyddio eich sgiliau rheoli amser, trefnu a chyfathrebu mewn unrhyw rôl weinyddol.
Mae digonedd o gyfleoedd ichi ennill cymwysterau pellach a chamu ymlaen yn eich gyrfa. Gallwch chi aros ym maes gweinyddiaeth, gan ddod yn arweinydd tîm neu oruchwyliwr o bosibl. Gallwch chi fynd ymlaen a dod yn rheolwr gweinyddol. Gallwch chi symud ymlaen i rolau eraill ym maes gofal iechyd hefyd. Os ydych chi’n hoff o graffau, gallwch chi ddefnyddio’ch sgiliau a phrofiad a symud i faes cyllid. Neu os mai TG sy’n mynd â’ch bryd, gallwch chi symud i faes gwybodeg.
Mae rhai staff gweinyddol, megis clercod wardiau a derbynyddion, yn gweld llawer o gleifion. Mae staff eraill, megis gweithredwyr switsfyrddau, yn gweithio mewn adeiladau pencadlys ac yn gweithio ran amlaf gyda staff gweinyddol eraill. Mae’n bosibl y bydd teipyddion, ysgrifenyddion a chynorthwywyr personol yn gweithio mewn ysbytai ac yn gweld staff gofal iechyd, ond heb weld yr un claf.