Hysbysiad Preifatrwydd AaGIC ar gyfer Goruchwylwyr Addysgol WDTFT

Nod yr hysbysiad preifatrwydd hwn yw bod yn dryloyw ynghylch pa ddata personol y bydd AaGIC yn ei gasglu amdanoch chi, sut fydd yn cael ei brosesu a’i storio, am ba hyd y bydd yn cael ei gadw a phwy fydd â mynediad i’ch data.

Mae’r GIG (AaGIC) yn rheolydd data o ran y data personol sydd ganddo am Oruchwylwyr Addysgol yng Nghymru.

Data personol yw’r wybodaeth sy’n golygu bod modd adnabod unigolyn yn uniongyrchol neu’n anuniongyrchol, pan fo’r wybodaeth yn cael ei darllen ar y cyd â data arall ym meddiant y rheolydd data.

O 25 Mai 2018, disodlodd y Rheoliad Diogelu Data Cyffredinol y Ddeddf Diogelu Data 1998, a dyma fydd y prif ddarn o ddeddfwriaeth yn y DU ynghylch data personol. Bydd y Rheoliad Diogelu Data Cyffredinol yn berthnasol i AaGIC. Dylai Goruchwylwyr Addysgol WDTFT gadw mewn cof bod yr hysbysiad preifatrwydd hwn yn berthnasol i’r holl waith prosesu data personol mewn perthynas â’ch swydd yn AaGIC.

Pam mae eich data personol yn cael ei gasglu

Cesglir eich data personol at y dibenion canlynol:

Cefnogi’r gwaith o reoli rhaglenni hyfforddiant – bydd eich data’n cael ei ddefnyddio i bennu allbynnau’r Rhaglenni a phennu nifer y Goruchwylwyr Addysgol sydd eu hangen ar y rhaglen yn y dyfodol.
Rheoli eich cydnabyddiaeth fel Goruchwylydd Addysgol – bydd data personol a gesglir at y diben hwn yn cael ei gadw mewn cronfa ddata, a fydd fel arfer yn cynnwys eich enw, y Bwrdd/Ymddiriedolaeth Iechyd sy’n eich cyflogi, eich rhif Cyngor Deintyddol Cyffredinol (GDC), cyfeiriad e-bost ac unrhyw wybodaeth arall sy’n berthnasol i’r gwaith o reoli eich rôl fel Goruchwylydd Addysgol yn effeithiol.
Prosesau sicrwydd ansawdd ac adolygu perfformiad – Mae’n bosibl y bydd eich data’n cael ei ddefnyddio i gefnogi dulliau lleol amrywiol, gan gynnwys ymweliadau practis.
Cydweithio â rhanddeiliaid i gyflawni gwelliannau a datblygiadau ar gyfer Hyfforddiant WDTF a’r gweithlu deintyddol yng Nghymru.
Cynnal diogelwch cleifion drwy reoli pryderon am berfformiad – Mae’n bosibl y bydd eich data personol yn cael ei rannu â’r GDC pe bai unrhyw bryderon difrifol ynghylch eich ffitrwydd i ymarfer fel Goruchwylydd Addysgol.
Cyfathrebu â chi am gyfleoedd datblygu, digwyddiadau, arolygon a gwybodaeth a allai fod o ddiddordeb i chi yn eich rôl fel Goruchwylydd Addysgol.
Hwyluso dull tryloyw o ran Hyfforddiant WDTF yng Nghymru.
Sicrhau uniondeb proffesiynol ymysg ein darparwyr hyfforddiant WDTF: er enghraifft dim cofnodion troseddol.
Gwybodaeth am ddiogelu.

Cynhelir swyddogaethau AaGIC er budd y cyhoedd. Mae angen prosesu data personol Goruchwylwyr Addysgol er mwyn cynnal y swyddogaethau hynny. Ymhlith y data personol sensitif a allwn fod angen ei rannu mae gwybodaeth ynghylch eich iechyd neu gofnod troseddol, os bydd angen i’r GDC neu eich cyflogwr gael gwybod.

Sut bydd eich data personol yn cael ei gasglu

Cesglir eich data personol pan fyddwch chi’n cyflwyno’ch ffurflen gais i fod yn Oruchwylydd Addysgol Hyfforddiant WDTF, a phan fyddwch yn llofnodi ac yn cyflwyno eich Contract.

Sut mae eich data personol yn cael ei gadw’n ddiogel

Dim ond TPD WDTF a’r Swyddog Gweinyddol yn AaGIC sy’n gallu cael mynediad i’ch data personol. Bydd eich data personol yn cael ei gadw am chwe blynedd ar ôl i chi adael eich rôl fel Goruchwylydd Addysgol. Bryd hynny, bydd eich data personol yn cael ei ddinistrio yn gyfrinachol ac mewn modd diogel.

Sut a pham allai eich data personol gael ei rannu

Cedwir y wybodaeth hon mewn cronfa ddata electronig â mynediad cyfyngedig iddi.

Mae’n bosibl y bydd eich data personol yn cael ei rannu gyda’r canlynol –

Llywodraeth Cymru
Byrddau Iechyd Lleol (BILlau)
Trydydd partïon at ddibenion adrodd neu ymchwil, a rheoli gwasanaethau megis portffolios.

Bydd AaGIC yn rhannu eich data personol â thrydydd partïon drwy ddefnyddio platfformau diogel yn unig, a lle bo angen i reoli eich rôl Goruchwylydd Addysgol, er enghraifft problemau perfformiad a chofrestru proffesiynol, uniondeb neu faterion ynghylch taliadau.

Ni fydd AaGIC yn trosglwyddo’ch data oni bai ei fod yn fodlon ar y materion canlynol:

1. Mae sail gyfreithiol a theg dros rannu eich data personol gyda’r trydydd parti.

2. Bydd y data yn cael ei drin gan y trydydd parti yn unol â chyfraith diogelu data.

Lle bo’r data’n cael ei ddefnyddio at ddibenion dadansoddi a chyhoeddi gan dderbynnydd neu drydydd parti, bydd unrhyw gyhoeddiad yn ddienw ac ni fydd modd adnabod unrhyw unigolyn. Golyga hyn nad yw’r data’n ddata personol mwyach.

Gall trydydd partïon gynnwys y sefydliadau canlynol: Cymdeithas Ddeintyddol Prydain (BDA), Llywodraeth Cymru, GDC

Eich hawliau a chyfrifoldebau

Mae’n bwysig eich bod yn cydweithio â ni i wneud yn siŵr bod yr wybodaeth sydd gennym amdanoch yn gywir ac yn gyfredol, felly rhowch wybod i AaGIC ar unwaith os oes angen cywiro neu ddiweddaru unrhyw ddata personol.

Fel arfer, bydd AaGIC yn cyfathrebu â chi dros e-bost. Felly, mae’n hanfodol bod gennych gyfeiriad e-bost effeithiol a diogel, neu mae’n bosibl na fydd gwybodaeth yn eich cyrraedd chi.

Ar unrhyw adeg, os hoffech dderbyn copi o’ch data personol sydd ym meddiant AaGIC, gallwch gyflwyno cais gwrthrych i wybodaeth yn ysgrifenedig. Mewn rhai achosion, bydd gennych hawl i wrthod prosesu sy’n debygol o achosi niwed neu drallod i chi, neu unrhyw benderfyniadau a wneir yn awtomataidd a allai gael effaith sylweddol arnoch chi.

Mae gennych hawl hefyd i wneud cais i ddata personol anghywir gael ei gywiro, ei flocio, ei ddileu neu ei ddinistrio.

Os hoffech arfer unrhyw rai o’r hawliau hyn, neu os oes gennych unrhyw bryderon ynghylch y ffordd mae eich data personol yn cael ei brosesu, cysylltwch ag AaGIC.

Os hoffech ddysgu mwy am ddiogelu data, ewch i wefan y Swyddfa Comisiynydd Gwybodaeth (ICO). Mae’r ICO yn ymdrin â chwynion ynghylch sut mae rheolwyr data wedi delio â materion gwybodaeth, ac yn cynnwys canllawiau defnyddiol.