Gwyddor Gofal Iechyd Cymru

Mae AaGIC yn ymrwymedig i alluogi trawsnewidiad ar draws yr holl weithlu Gwyddor Gofal Iechyd, sy’n broffesiwn sy’n allweddol i drawsnewidiad GIG Cymru ac yn ganolog i ddarparu gofal o safon.

Mae addysg a hyfforddiant Gwyddor Gofal Iechyd wedi’u comisiynu gan AaGIC ar draws yr holl lwybr gyrfaoedd, o Gynorthwy-ydd Lefel 3 a 4 i hyfforddiant Ymgynghorydd lefel doethuriaeth a’r tu hwnt. Mae trawsnewid y gweithlu’n ymestyn ymhellach y tu hwnt i hyn, ac mae AaGIC yn arwain ac yn gweithio gyda llawer o raglenni a phrosiectau strategol ar draws GIG Cymru i alluogi arweinyddiaeth a datblygu gyrfa, ailgynllunio rolau a gwasanaethau, cynllunio ar gyfer olyniaeth a llawer mwy ym maes Gwyddor Gofal Iechyd.

Ynglŷn â Gwyddor Gofal Iechyd

Mae Gwyddor Gofal Iechyd yn disgrifio set fawr o broffesiynau, gyda mwy na 50 o ddisgyblaethau y gellir eu grwpio i 5 maes:

Gwyddonwyr bywyd sy’n gweithio mewn labordai ledled GIG Cymru,
Ffisiolegwyr Clinigol, sy’n wynebu cleifion, ac sy’n cynnal clinigau diagnostig ac ailsefydlu ar draws gofal eilaidd (rhai mewn gofal cynradd),
Gwyddonwyr ymarferol ac arloesol yn y Gwyddorau Ffisegol a Pheirianneg Glinigol,
Arbenigwyr gwyddoniaeth a digidol ym maes Biowybodeg, y gallu i weithio mewn llawer o feysydd gwasanaeth ar draws GIG Cymru,
ac, yng Nghymru, Radiograffyddion Therapiwtig a Diagnostig sy’n gweithio mewn gwasanaethau delweddu hefyd.

Mae Gwyddonwyr Gofal Iechyd yn 5% o weithlu’r GIG ac maent yn rhan o 80% o benderfyniadau clinigol. Maent yn arwain Byrddau ac Ymddiriedolaethau Iechyd ledled Cymru’n aml, yn ysgogi ansawdd a diogelwch, ymchwil ac arloesi, ac mae Gwyddonwyr Gofal Iechyd yn gweithio ar reng flaen datblygiadau clinigol a thechnolegol. Mae rhagor o wybodaeth ar gael yma: Ynglŷn â Gwyddor Gofal iechyd.

Rhaglen Gwyddor Gofal Iechyd

Ar 23 Mawrth 2018, cyhoeddodd Llywodraeth Cymru, gyda chefnogaeth GIG Cymru, fframwaith Gwyddor Gofal Iechyd yn GIG Cymru – Edrych tuag at y Dyfodol. Mae’r ddogfen yn disgrifio rhaglen o weithgareddau a gynlluniwyd i arwain Gwyddor Gofal Iechyd yn GIG Cymru i’r dyfodol ac achub ar y cyfleoedd sy’n cael eu cyflwyno yng Nghynllun Hir Dymor ar gyfer GIG Cymru.

Mae’r Rhaglen Gwyddor Gofal Iechyd sy’n ganlyniad wedi cael ei rheoli gan AaGIC ers 1 Hydref 2020, gyda Thîm Rhaglen sy’n arbenigo mewn rheoli rhaglenni strategol. Drwy weithio matrics ar draws holl dimau AaGIC, gan gynnwys comisiynu a darparu addysg aml-broffesiynol, arweinyddiaeth, gyrfaoedd, Gwnaed yng Nghymru, cynllunio gweithlu, cyfathrebu a dysgu digidol, yn ogystal â gweithio’n eang ar draws GIG Cymru a llawer o sefydliadau cenedlaethol, mae’r tîm wedi gallu dangos gwerth y rhaglen hon fel rhan o waith Trawsnewidiad AaGIC.

Mae Tîm y Rhaglen yn gyfrifol am reoli pob agwedd ar y rhaglen gymhleth ac aml-ochrog hon yn llwyddiannus, gan weithio mewn partneriaeth â Chyfarwyddwr Therapïau a Gwyddor Iechyd a thîm polisi Gwyddor Iechyd Llywodraeth Cymru, a gweithio gyda Rhwydwaith Gwyddor Gofal Iechyd hirsefydlog a dylanwadol a’r holl broffesiwn gwyddor gofal iechyd ledled GIG Cymru.

Adnoddau, Llifau Amser a Digwyddiadau’r Rhaglen

Mae rhyddhau a manteisio ar botensial y gweithlu Gwyddor Gofal Iechyd o bwysigrwydd hanfodol er mwyn mynd i’r afael â’r heriau mae GIG Cymru bellach yn eu hwynebu nawr ac yn y dyfodol. Uchelgais y rhaglen waith hon yw creu amgylchedd yn GIG Cymru lle gall Gwyddor Gofal Iechyd ffynnu drwy sefydliad cydnabyddiaeth gyffredinol o’r proffesiwn, hyrwyddo ystod amrywiol o ddewisiadau gyrfa gwerthfawr sy’n rhoi boddhad a galluogi gwyddonwyr gofal iechyd i gydweithio er mwyn cyflawni pob rhan o weledigaeth Edrych tuag at y Dyfodol GIG Cymru.

Mae’r Rhwydwaith Gwyddor Gofal Iechyd yn allweddol i’r cydweithio hwnnw ledled Cymru ac mae wedi’i ddisgrifio yn fframwaith Edrych tuag at y Dyfodol fel y grŵp proffesiynol sydd wrth wraidd y Rhaglen Gwyddor Gofal iechyd. Crëwyd y grŵp hwn o Wyddonwyr Gofal Iechyd am y tro cyntaf yng nghamau cynnar datblygu Moderneiddio Gyrfaoedd Gwyddonol yn Nghymru ac mae’n parhau i ddatblygu, gan ddylanwadu nid yn unig o fewn Cymru ond ar draws y DU.

Gwyddor Gofal Iechyd Cymru … crëwyd logo ac arwyddair “Gwireddu Uchelgeisiau Yfory, Heddiw!”. Mae adnoddau ar gael i’w defnyddio gan holl Wyddonwyr Gofal iechyd ar draws GIG Cymru: Adnoddau Gwyddor Gofal Iechyd Cymru

Cynhelir digwyddiadau rheolaidd ledled y flwyddyn, a’r uchafbwynt yw cynhadledd Gwyddor Gofal Iechyd Cymru flynyddol; rhagor o fanylion yma: Newyddion a Digwyddiadau Gofal Iechyd.

Trawsnewidiad Gwyddor Gofal Iechyd Ehangach

Mae’r Rhaglen Gwyddor Gofal Iechyd yn un rhan yn unig o gyfranogiad AaGIC mewn trawsnewid y proffesiwn yn GIG Cymru. Mae Trawsnewid Gwyddor Gofal Iechyd a thimau ar draws AaGIC yn darparu arbenigedd gweithlu ac addysg i raglenni diagnostig aml-ddisgyblaethol cenedlaethol ym meysydd Delweddu, Patholeg, Endosgopi, Genomeg a Thomograffeg Allyru Positronau (PET), rhwydweithiau clinigol a grwpiau proffesiwn.

Am ragor o wybodaeth am unrhyw agwedd ar Drawsnewid Gwyddor Gofal iechyd, e-bostiwch y Tîm Rhaglenni: HEIW.HCS@wales.nhs.uk