Mae AaGIC yn arwain ar drawsnewid y gweithlu i gryfhau gofal iechyd ataliol a gofal iechyd sy'n seiliedig ar le ledled Cymru
Fel rhan o'r Cynllun Tymor Canolig Integredig 2025-26, mae Addysg a Gwella Iechyd Cymru (AaGIC) wedi cyhoeddi 8 blaenoriaeth strategol i ddatblygu gweithlu medrus a chynaliadwy, gan sicrhau gofal gwell a chanlyniadau iechyd gwell i bobl Cymru.
Mae blaenoriaeth dau yn canolbwyntio ar drawsnewid y gweithlu i gryfhau gofal iechyd ataliol a gofal iechyd sy'n seiliedig ar le ledled Cymru.
Mae'r flaenoriaeth strategol hon, sy'n ganolog i weledigaeth AaGIC ers ei sefydlu, yn gyrru trawsnewid y gweithlu gofal iechyd ymlaen gan sicrhau gwasanaeth gofal iechyd cynaliadwy, medrus, sy'n canolbwyntio ar y gymuned. Mae hyn yn rhan o ymdrech genedlaethol i ail-lunio darpariaeth gofal iechyd—gan ddod â gwasanaethau'n agosach at gartrefi pobl a rhoi atal wrth wraidd gofal.
Bydd AaGIC hefyd yn ymgorffori atal ar draws y gweithlu iechyd drwy:
- Datblygu'r gweithlu gofal iechyd mewn lleoliadau sylfaenol a chymunedol, fel mewn meddygfeydd teulu a chlinigau cymunedol, fel y gall y claf weld yr arbenigwr cywir heb orfod teithio'n bell.
- Mynediad gwell at feddyginiaethau a chyngor drwy’r Cynllun Gweithlu Fferylliaeth, gall fferyllfeydd yn y gymuned ddarparu cyngor a thriniaeth ddiogel ac amserol pan fo angen.
- Gwasanaethau deintyddol gwell fel rhan o'r Cynllun Gweithlu Deintyddol, cynyddu mynediad at ofal deintyddol ledled Cymru—gan ei gwneud hi'n haws cael triniaeth ac archwiliadau amserol.
- Cymorth ar gyfer adferiad ac annibyniaeth: buddsoddi mewn gwasanaethau adsefydlu a gofal ataliol lleol, gan helpu pobl i wella o salwch ac aros yn iach yn eu cartrefi am hirach.
Mae'r flaenoriaeth strategol hon hefyd yn gweld AaGIC yn cydweithio'n agos â chydweithwyr yn Iechyd Cyhoeddus Cymru, i asesu sut y gallant, yn unigol ac ar y cyd, ymgorffori atal yn y gweithlu gan gynnwys:
- Cefnogi iechyd a lles staff y GIG
- Cryfhau gallu'r GIG i ymateb i heriau iechyd y dyfodol
- Ymgorffori meddwl a sgiliau ataliol ym mhob hyfforddiant ac addysg yn y GIG
- Llunio gweithlu iechyd cyhoeddus sy'n barod i ddiwallu anghenion y dyfodol
- Archwilio sut y gallwn gefnogi arweinwyr y GIG i hyrwyddo cymunedau iach ac atal
- Optimeiddio dysgu byd-eang i wella gwybodaeth o fewn gweithlu GIG Cymru
Mae'r gwaith hwn yn adeiladu ar sylfeini cadarn gan gynnwys lansio rhwydwaith o academïau amlbroffesiynol sylfaenol a chymunedol ar draws GIG Cymru yn 2023, gyda'r nod o wella addysg a hyfforddiant ar gyfer y gweithlu gofal sylfaenol ehangach. Yn ogystal, fel rhan o'u gwaith craidd, bydd AaGIC yn parhau i ehangu a gwella hyfforddiant meddygon teulu a chynyddu cyfleoedd lleoliadau cyn cofrestru mewn lleoliadau sylfaenol a chymunedol, gan helpu i ehangu mynediad at yrfaoedd a chryfhau'r biblinell gweithlu yn y dyfodol.
Dywedodd Ian Mathieson, Cyfarwyddwr Strategaeth Addysg a Thrawsnewid, “Drwy ehangu addysg mewn lleoliadau sylfaenol a chymunedol, gallwn ni fynd i’r afael â’r heriau iechyd yn y byd go iawn sy’n wynebu Cymru heddiw ac yn y blynyddoedd i ddod.”
“Bydd cleifion yn elwa o ofal mwy lleol sydd wedi’i deilwra i’w hanghenion unigol, gyda mwy o bwyslais ar atal salwch yn hytrach na’i drin yn unig.”
Mae gan staff GIG Cymru fynediad gwell at hyfforddiant, gan eu galluogi i ddatblygu'r sgiliau sydd eu hangen i gefnogi cleifion yn well a symud ymlaen yn eu gyrfaoedd - gan helpu i adeiladu gwasanaeth iechyd cymunedol mwy cynaliadwy a gwydn.
Mae Cynllun Tymor Canolig Integredig 2025–28 Addysg a Gwella Iechyd Cymru yn cynnwys cerrig milltir clir ar gyfer y gwaith hwn, gan sicrhau ei fod yn cefnogi blaenoriaethau cenedlaethol ac anghenion lleol. Gyda ffocws parhaus ar gydweithio â Byrddau Iechyd a rhanddeiliaid ledled Cymru, mae'r sefydliad yn gosod sylfeini cryf ar gyfer dyfodol iachach a mwy cynaliadwy.
Am ragor o wybodaeth gweler ein Cynllun Tymor Canolig Integredig (IMTP) neu gysylltwch â heiw@wales.nhs.uk.
Os oes gennych ddiddordeb mewn deall mwy am ein rhaglen waith Blaenoriaeth Un, ewch i AaGIC yn cyflwyno cynllun i roi hwb i ansawdd a mynediad gofal y GIG ledled Cymru - AaGIC