Therapi galwedigaethol

Beth yw Therapi Galwedigaethol?

Pan fo therapyddion iechyd galwedigaethol yn siarad am ‘alwedigaeth’, byddant yn sôn am yr holl weithgareddau y mae pobl eu gwneud, sy’n cynnwys:

Edrych ar ôl ein hunain (pethau fel golchi a bwyta)
Gwaith/bod yn gynhyrchiol (mynd i’r ysgol neu brifysgol, gweithio, gwirfoddoli, gofalu am bobl eraill)
Hamdden (cael hwyl, cymdeithasu a hobïau)

Weithiau, gall salwch, anabledd, heneiddio neu newid i’ch amgylchiadau personol olygu ei bod yn anos i wneud rhai o weithgareddau normal neu arferol bywyd.

Ai Therapydd Galwedigaethol yw’r yrfa iawn imi?

Mae Therapi Galwedigaethol yn yrfa addas i bobl sy’n meddu ar y canlynol:

ymagwedd creadigol ac addasadwy at y gwaith
sgiliau ysgrifenedig da ar y cyd â sgiliau cyfathrebu da ar lafar
y gallu i ffurfio perthnasau gwaith da ag amrywiaeth eang o bobl
amynedd, penderfyniad ac agwedd gadarnhaol
y gallu i ddeall a derbyn blaenoriaethau pobl eraill a’u ffyrdd o fyw
ymagwedd ymarferol i ddatrys problemau
stamina meddyliol a chorfforol lefel uchel
awydd cryf i helpu pobl

Beth mae Therapyddion Galwedigaethol yn ei wneud?

Mae therapyddion galwedigaethol yn helpu pobl o bob oedran i wneud y gweithgareddau sy’n bwysig iddynt. Byddant wedyn yn datblygu cynllun gyda’r person, a chyda’u gofalwyr os yw’n briodol.

Mae therapyddion galwedigaethol yn darparu cymorth i’r bobl hynny y mae eu hiechyd yn eu rhwystro rhag gwneud y gweithgareddau sy’n bwysig iddynt. Gall therapydd galwedigaethol nodi pa gryfderau ac anawsterau sydd gennych chi yn eich bywyd bob dydd, megis gwisgo, coginio, mynd i’r siopau, neu aros yn y gwaith a byddant yn eich helpu i ddod o hyd i ddatrysiadau ymarferol. Gall hyn fod oherwydd bod gennych:

gyflwr meddygol - er enghraifft, arthritis gwynegol, sglerosis ymledol, Clefyd Parkinson, Syndrom Blinder Cronig
anghenion dysgu
neu gyflwr iechyd meddwl - er enghraifft, anhwylder deubegwn, iselder, sgitsoffrenia, neu’n gaeth i rywbeth

Ar ôl nodi’r anawsterau mae unigolyn yn eu hwynebu wrth wneud tasgau pob dydd, gall therapyddion galwedigaethol helpu gan wneud un o’r canlynol:

dangos sut mae ymarfer y gweithgareddau mewn cyfnodau hylaw
dysgu ffordd wahanol o wneud y gweithgaredd
argymell newidiadau a fydd yn gwneud y gweithgaredd yn haws
darparu offer a dyfeisiau neu addasu’ch amgylchedd er mwyn gwneud gweithgareddau yn haws

Defnyddir therapi galwedigaethol hefyd fel rhan o raglen adfer ar ôl damwain, salwch neu lawdriniaeth i'ch helpu i adfer ac adennill cymaint annibyniaeth â phosibl. Er enghraifft:

Ar ôl cael gosod clun newydd, gall rhywun ei chael yn anodd mynd i mewn ac allan i'r baddon. Gellid gosod rheiliau gafael yn yr ystafell ymolchi i wneud hyn yn haws
Gall rhywun sydd ag arthritis gwynegol – cyflwr sy'n achosi poen yn y cymalau ac yn peri iddynt chwyddo – ei chael hi'n anodd codi gwrthrychau bach. Mae’n bosibl y caiff offer arbennig ei wneud, fel plyciwr llysiau â handlen fawr er enghraifft, fel bod y dasg yn haws ei gwneud
Yn dilyn strôc - efallai y bydd un rhan o’ch corff yn mynd yn wan a bydd yn rhaid ichi ddysgu ffyrdd newydd o wneud gweithgareddau pob dydd

Yn greiddiol i bob un o’r newidiadau hyn mae ffocws y therapydd galwedigaethol ar helpu'r claf i gynnal a gwella eu gallu i wneud tasgau pob dydd.

Ymhle mae Therapyddion Galwedigaethol yn gweithio?

Mae Therapyddion Galwedigaethol yn gweithio ar draws amrywiaeth o leoliadau gan gynnwys:

Ysbytai
Gwasanaethau Cymdeithasol
Trydydd sector, Mentrau Cymdeithasol ac Elusennau
Cwmnïau Preifat
Swyddi Hunangyflogedig

Pa oriau mae therapyddion galwedigaethol yn gweithio?

Fel arfer mae therapyddion galwedigaethol yn gweithio 37.5 awr yr wythnos yn y GIG. Yn aml, mae'r rhain yn ystod yr wythnos o fewn oriau swyddfa. Serch hynny, mae angen cynyddol i Therapyddion Galwedigaethol weithio ar y penwythnos neu’n gynharach neu’n hwyrach yn y dydd, a hynny er mwyn bodloni anghenion y bobl rydym ni’n gweithio gyda nhw.

Faint mae Therapyddion Galwedigaethol yn ei ennill?

Yn y GIG, mae therapydd galwedigaethol cymwys ar lefel mynediad yn dechrau ar Fand 5; Ewch i'n hadran am Gyflog a Buddion am ragor o wybodgeth.

Pa gyfleoedd sydd ar gael i Therapyddion Galwedigaethol gamu ymlaen yn eu gyrfa?

Unwaith ichi ymgymhwyso ac ennill ychydig o brofiad clinigol, mae nifer o ddewisiadau cyflogaeth ar gael, gan gynnwys:

Dod yn Uwch Therapydd Galwedigaethol mewn maes arbenigol
Darlithydd prifysgol
Rheolwr therapi

Sut y galla i ddod yn Therapydd Galwedigaethol?

Oes angen gradd arna i?	Oes. Os ydych chi am weithio fel Therapydd Galwedigaethol, bydd angen i chi gwblhau gradd. Yn ogystal â hyn, bydd yn rhaid ichi gofrestru â’r Cyngor Proffesiynau Gofal ac Iechyd ar ôl ymgymhwyso.
Ymhle y galla i hyfforddi yng Nghymru?	Cynigir cyrsiau gradd Therapi Galwedigaethol ym Mhrifysgol Caerdydd a Phrifysgol Glyndŵr (Wrecsam). Cynigir cyrsiau ledled y DU mewn 31 o brifysgolion.
Oes cyllid ar gael?	Oes, am ragor o wybodaeth am y cyllid sydd ar gael a chymhwysedd ar ei gyfer, ewch i Wasanaethau Dyfarniadau Myfyrwyr.
Oes cyfleoedd ôl-raddedig?	Os oes gennych chi radd berthnasol a phrofiad ym maes gofal iechyd eisoes, gall fod yn bosibl ichi wneud cwrs ôl-raddedig. Yng Nghymru, cynigir y cwrs ym Mhrifysgol Caerdydd. Mae cymhwyster MSc ychwanegol ar gael hefyd.
Oes angen profiad arna i er mwyn ymgeisio ar gyfer y cwrs?	Mae cyngor pellach ar gael yn y Llawlyfr Therapi Galwedigaethol. I ddysgu am brofiad gwaith a chyfleoedd i wirfoddoli yn GIG Cymru, ewch i'n hadran Gwaith.
Sut y galla i ymgeisio am swydd?	Hysbysebir pob swydd yn GIG Cymru ar wefan NHS Jobs. Ewch i’r adran Gwaith i gael rhagor o wybodaeth. Hysbysebir swyddi mewn awdurdodau lleol gan sefydliadau unigol fel arfer ar eu gwefan eu hunain. Hysbysebir rolau sydd wrthi’n codi yn y maes, fel gweithio i’r trydydd sector, yn unigol gan sefydliadau.