Rhanddeiliaid yn helpu i lunio dyfodol addysg gofal iechyd yng Nghymru

Cyhoeddwyd: 15/06/2026

Mae Addysg a Gwella Iechyd Cymru (AaGIC) yn datblygu Strategaeth Addysg gyntaf Cymru ar gyfer gofal iechyd, gan nodi gweledigaeth hirdymor a fydd yn sicrhau bod yr addysg a'r hyfforddiant rydym yn eu comisiynu a'u darparu yn cefnogi datblygu gweithlu medrus, cynaliadwy a pharod i'r dyfodol ledled GIG Cymru. Bydd hyn yn helpu i ddarparu gwell gofal a gwella canlyniadau iechyd y boblogaeth.

Fel corff gweithlu strategol GIG Cymru, mae AaGIC yn comisiynu ac yn darparu addysg a hyfforddiant i filoedd o weithwyr gofal iechyd proffesiynol ar bob cam o'u gyrfa. Bydd y strategaeth yn helpu i sicrhau bod y gwaith hwn yn parhau i ymateb i heriau mawr, gan gynnwys poblogaeth sy'n heneiddio, newidiadau technolegol cyflym a disgwyliadau newidiol ynghylch sut mae pobl yn dysgu ac yn datblygu. 

Dros y flwyddyn ddiwethaf, rydym wedi gweithio gyda phartneriaid ar draws y system i lunio'r strategaeth. Yn Hydref 2025, gwahoddwyd ystod eang o randdeiliaid gan gynnwys dysgwyr, addysgwyr, cyflogwyr, darparwyr addysg, sefydliadau statudol ac arbenigwyr polisi i gyfrannu tystiolaeth, syniadau a mewnwelediadau. Mae AaGIC yn ddiolchgar i bawb a gymerodd ran ac a rannodd eu profiadau mewn ffordd mor agored. 

Hoffem hefyd ddiolch i'r rhai a ymunodd â’r dau weithdy rhanddeiliaid diweddar yng Nghaerdydd a Llandudno. Daeth y sesiynau hyn â thrafodaethau gwerthfawr, adborth adeiladol a mewnwelediadau ymarferol, a byddant yn helpu i lunio strategaeth sy'n uchelgeisiol, ac wedi'i seilio ar realiti addysg gofal iechyd yng Nghymru. Mae'r wybodaeth rydyn ni wedi'i chasglu bellach yn cael ei hadolygu'n fanwl, a bydd themâu allweddol yn cael eu cyhoeddi ar Dudalen we AaGIC yn fuan. 

Dywedodd  Dr Ian Mathieson, Cyfarwyddwr Strategaeth Addysg a Thrawsnewid AaGIC: 

"Mae datblygu Strategaeth Addysg gyntaf Cymru ar gyfer ein gweithlu gofal iechyd yn gyfle mawr. Mae'n hanfodol ei fod yn cael ei siapio gan leisiau'r rhai sy'n dysgu, addysgu a gweithio o fewn y system bob dydd. Mae'r syniadau a'r safbwyntiau a rennir drwy'r alwad am dystiolaeth a gweithdai rhanddeiliaid yn ein helpu i adeiladu strategaeth sy'n uchelgeisiol ac wedi'i seilio ar brofiad byw." 

Am ragor o wybodaeth ewch i Strategaeth Addysg - AaGIC neu gysylltwch â HEIW.Educationstrategy@wales.nhs.uk