Optometryddion Rhagnodi Annibynnol yn cwblhau lleoliadau clinigol mewn Practisau Hyfforddi Uwch yn y gymuned ledled Cymru.
Mae Optometreg Addysg a Gwella Iechyd Cymru (AaGIC) yn trawsnewid mynediad at hyfforddiant clinigol uwch drwy alluogi Optometryddion Rhagnodi Annibynnol (IP) i ennill profiad ymarferol hanfodol mewn Practisau Hyfforddi Uwch (ATPs) yn y gymuned. Mae'r fenter hon yn rhan o strategaeth ehangach i ehangu cyfleoedd hyfforddi, datblygu arbenigedd clinigol uwch o fewn y gweithlu optometreg, a gwella mynediad cleifion at ofal amserol o ansawdd uchel.
Dros y flwyddyn ddiwethaf, mae AaGIC wedi llwyddo i sefydlu 18 o ATPs ledled Cymru, gan greu cyfleoedd ar gyfer lleoliadau clinigol o fewn practisau cymunedol. Gan weithio mewn partneriaeth agos ag adrannau offthalmoleg, ATPs, a chlinigau Addysgu a Thrin Prifysgol Caerdydd, mae AaGIC wedi cydlynu 42 o leoliadau clinigol, gyda 24 o ymarferwyr yn cwblhau rhan o'u hyfforddiant mewn ATPs. Mae mwy na 150 o sesiynau hyfforddi wedi cael eu hariannu, gan roi profiadau dysgu cyfoethocach ac amrywiol i hyfforddeion sy'n eu paratoi'n well ar gyfer rolau clinigol uwch.
Mae'r buddsoddiad strategol hwn eisoes yn cyflawni canlyniadau mesuradwy. Yn ystod y 12 mis diwethaf, mae rhestrau aros ar gyfer optometryddion sydd angen lleoliadau IP wedi'u lleihau'n sylweddol - gyda'r gwelliant mwyaf dramatig a welwyd ym Mwrdd Iechyd Prifysgol Caerdydd a'r Fro (CVUHB), lle mae amseroedd aros wedi gostwng o ddwy flynedd i sero.
Nik Sheen, Cyfarwyddwr Cyswllt Optometreg “Mae’r newidiadau hyn yn gwella ansawdd ac effeithlonrwydd hyfforddiant, drwy gryfhau ein gweithlu optometreg, rydym hefyd yn cefnogi timau gofal eilaidd sydd o dan bwysau ac yn gwella mynediad cleifion at ofal.”
Rhannodd un Optometrydd Rhagnodi Annibynnol dan hyfforddiant ei brofiad o leoliad cymunedol: “Mae wedi rhoi hwb gwirioneddol i’m hyder mewn rhagnodi. Rwy'n teimlo'n fwy hyderus wrth asesu cleifion a gwneud diagnosis o'u cyflyrau. Rwy'n fwy ymwybodol o wahanol opsiynau rheoli.”
Mae rhaglen ATP Addysg a Gwella Iechyd Cymru yn adlewyrchu ei hymrwymiad i gydweithio, arloesi a datblygu'r gweithlu ar draws system gofal iechyd Cymru.
Am ragor o wybodaeth neu i archwilio cyfleoedd i gymryd rhan, cysylltwch â:
Tîm Optometreg ATP AaGIC
📧 HEIW.optometryATP@wales.nhs.uk