Mae AaGIC yn lansio Rhwydwaith Optimeiddio Llif Cleifion Ysbytai Cenedlaethol

Cyhoeddedg 31/03/2026

Mae llif cleifion yn un o'r heriau mwyaf parhaus sy'n wynebu gwasanaethau gofal brys ac argyfwng ledled Cymru. Mae afiechydon tymhorol fel norofirws a'r ffliw yn rhoi pwysau ychwanegol ar gapasiti ysbytai, gan waethygu'r rhwystrau presennol wrth dderbyn, trin a rhyddhau cleifion. 

Mae llif cleifion effeithlon yn sicrhau bod pobl yn symud yn hawdd trwy bob cam o'u taith gofal, o'u derbyn hyd at eu rhyddhau neu eu trosglwyddo, heb unryw oedi diangen. Pan fydd llif cleifion yn cael ei amharu, gall ysbytai ei chael hi'n anodd derbyn cleifion o adrannau brys, gan arwain at amseroedd aros hirach a mwy o bwysau ar draws GIG Cymru. 

Er mwyn helpu'r gweithlu i fynd i'r afael â'r heriau hyn, mae Addysg a Gwella Iechyd Cymru (AaGIC) wedi lansio'r Rhwydwaith Optimeiddio Llif Cleifion Ysbytai ar Y Tŷ Dysgu, y platfform e-ddysgu cenedlaethol ar gyfer GIG Cymru. 

Mae'r rhwydwaith newydd yn darparu lle cenedlaethol a rennir i weithwyr proffesiynol iechyd a gofal, rheolwyr ac arweinwyr systemau gyfnewid gwybodaeth, cael mynediad at offer ymarferol, a dysgu o arloesiadau sydd eisoes yn gwneud gwahaniaeth ledled Cymru. Drwy ddod â phobl ynghyd ar draws sefydliadau a disgyblaethau, mae'n cefnogi dull mwy cyson a chydlynol o wella llif cleifion.  

Gall gweithio ar eich pen eich hun ei gwneud hi'n anodd datrys problemau llif. Mae'r rhwydwaith yn galluogi timau i ddysgu oddi wrth ei gilydd, mabwysiadu dulliau cyson a rhannu atebion sydd eisoes wedi bod yn  llwyddiannus mewn mannau eraill.   

Dywedodd Lisa Basset, Rheolwr Rhaglen ar gyfer Gofal Brys ac Argyfwng yn AaGIC:

“Nid yw gwella llif cleifion a sicrhau rhyddhau amserol yn rhywbeth y gall unrhyw dîm neu sefydliad ei ddatrys ar ei ben ei hun. Drwy gydweithio, rhannu dysgu ac adeiladu ar yr hyn sydd eisoes yn gweithio ledled Cymru, gallwn leihau oedi diangen, gwella profiad cleifion a sicrhau bod pobl yn derbyn gofal yn y lle iawn, ar yr amser iawn.” 

Y llynedd, cydweithiodd AaGIC â'r Rhaglen Chwe Nod Cenedlaethol ar gyfer Gofal Brys ac Argyfwng, i ddylunio a chyflwyno cyfres o weminarau Cefnogi Cynllunio Rhyddhau ac Optimeiddio Llif Cleifion Ysbytai ledled Cymru. 

Nod y gyfres oedd meithrin hyder ymhlith gweithwyr iechyd a gofal proffesiynol i gymhwyso'r Fframwaith Optimeiddio Llif Cleifion Ysbytai yn ymarferol. Wedi'i ddatblygu i leihau arosiadau diangen yn yr ysbyty a chefnogi rhyddhau cleifion yn amserol, mae'r fframwaith yn hyrwyddo dulliau sy'n galluogi cleifion i wella yn y lleoliad mwyaf priodol. 

Rhoddodd pob gweminar fewnwelediadau ymarferol i sut y gall yr egwyddorion wneud gwahaniaeth o ddydd i ddydd, gan gynnwys: 

• Cynllunio rhyddhau cleifion yn effeithiol: mae cynllunio rhyddhau clir, cynnar a rhagweithiol yn helpu i osgoi oedi, yn sicrhau bod cleifion yn dychwelyd adref neu i ofal cymunedol yn ddiogel, ac yn rhyddhau gwelyau  i'r rhai sydd eu hangen fwyaf. 

• Grymuso nyrsys a'r tîm amlddisgyblaethol mewn rowndiau ward: mae cryfhau rôl a llais y tîm amlddisgyblaethol cyfan mewn rowndiau ward yn helpu i nodi problemau'n gynharach, yn cefnogi gwneud penderfyniadau amserol, ac yn sicrhau bod anghenion cleifion yn cael eu hadolygu'n gyson ac yn effeithlon. 
• Defnydd priodol o atgyfeiriadau therapi: mae defnyddio atgyfeiriadau therapi yn effeithiol yn sicrhau bod cleifion yn derbyn asesiadau amserol a chymorth adsefydlu, gan leihau dirywiad y gellir ei osgoi a galluogi rhyddhau diogel a chynharach. 
• Strategaethau ymarferol i ryddhau gwelyau acíwt:rhannodd y gweminarau enghreifftiau go iawn o sut mae timau ledled Cymru yn gwella llif, o gydlynu rhyddhau gwell i ddefnydd gwell o lwybrau ar yr un diwrnod. 

Mae'r gweminarau, a gafodd eu recordio ac sydd bellach ar gael i'w gwylio o fewn y Rhwydwaith Optimeiddio Llif Ysbytai newydd ar Y Tŷ Dysgu, wedi cael derbyniad da gan staff ar draws GIG Cymru, gyda dros 350 o fynychwyr ac adborth cadarnhaol gan gyfranogwyr. 

Dywedodd mynychwr dienw:

“Dylai hyn ddod yn rhan o hyfforddiant Gorfodol Cymru Gyfan i bob aelod o staff, boed ar y rheng flaen ai peidio gan y byddai’n hyrwyddo dealltwriaeth ymhlith y cyhoedd nad yw ysbyty yn lle diogel pan nad oes angen i chi fod yno a bod derbyniadau hir yn creu mwy o broblemau nag y maent yn eu datrys."

Dywedodd Dr Siobhan Lewis, Arweinydd Clinigol y Rhaglen Chwe Nod Cenedlaethol ar gyfer Gofal Brys ac Argyfwng: 

“Mae’r gyfres o weminarau wedi dangos gwir werth dod â phobl ynghyd i ganolbwyntio ar atebion ymarferol. Drwy rannu enghreifftiau o bob cwr o Gymru a'u cysylltu â'r Chwe Nod ar gyfer Gofal Brys ac Argyfwng, rydym wedi helpu timau i feithrin hyder i gymhwyso'r Fframwaith Optimeiddio Llif Ysbytai yn eu lleoliadau eu hunain a gwneud gwelliannau ystyrlon i gynllunio rhyddhau cleifion a llif cleifion.” 

Mae Rhwydwaith Optimeiddio Llif Cleifion Ysbyty ar gael ar Y Ty Dysgu.

Mae AaGIC yn parhau i gefnogi cydnerthedd gwasanaethau gofal brys ac argyfwng yng Nghymru trwy amrywiaeth o fentrau. Mae rhagor o wybodaeth ar gael ar dudalen we'r rhaglen Gofal Brys ac Achosion Brys: Rhaglen gofal brys ac argyfwng - AaGIC