Mae AaGIC yn lansio Ffordd - adnodd lles cenedlaethol ar gyfer y gweithlu iechyd meddwl yng Nghymru

Cyhoeddedg 31/03/2026

Mae Addysg a Gwella Iechyd Cymru (AaGIC) wedi lansio Ffordd, sef canolfan lles digidol ar gyfer y gweithlu iechyd meddwl. Yn cyd-fynd â Chynllun Strategol y Gweithlu Iechyd Meddwl ar gyfer Iechyd a Gofal Cymdeithasol Cymru , mae'r ganolfan wedi'i chynllunio i gryfhau gwydnwch, meithrin hyder a chefnogi diogelwch seicolegol ledled Cymru. Mae'n dod â gwybodaeth ddibynadwy, offer ymarferol ac arweiniad tosturiol at ei gilydd mewn un lle hawdd ei ddefnyddio.

Crëwyd Ffordd ar ôl i staff ofyn am un lle dibynadwy i ddod o hyd i gefnogaeth lles. Roedden nhw eisiau adnoddau sy'n adlewyrchu realiti eu rolau a gofod sy'n teimlo'n dosturiol, yn ddiogel ac yn syml i'w ddefnyddio. Mewn ymateb i hyn, gweithiodd AaGIC mewn partneriaeth ag ymarferwyr, arweinwyr lles, gwasanaethau seicolegol a phartneriaid ar draws iechyd a gofal cymdeithasol yng Nghymru i ddatblygu Ffordd.

Ffordd yw'r gair Cymraeg am "way". Mae'r enw'n adlewyrchu'r nod o gefnogi pobl drwy gydol eu gyrfaoedd, nid yn unig yn ystod cyfnodau anodd.

Mae AaGIC yn cydnabod y pwysau emosiynol a seicolegol sy'n dod gyda gwaith iechyd meddwl. Mae Ffordd yn cynnig cefnogaeth wybodus am drawma ar ôl digwyddiadau anodd fel cwestau, hunanladdiad cleifion neu ddigwyddiadau diogelu. Mae hefyd yn dod ag offer lles bob dydd, canllawiau myfyriol, gwasanaethau cymorth lleol a chenedlaethol a chyfleoedd i gysylltu â chyfoedion trwy gymunedau ymarfer i mewn i un lle.

Drwy wneud cymorth yn hawdd i'w gael, mae Ffordd yn helpu staff i deimlo'n llai ynysig a chael mwy o gefnogaeth i fyfyrio, adfer ac aros yn gadarn yn eu gwaith. Mae'n helpu pobl i adennill hyder ar ôl profiadau heriol a chanolbwyntio ar ddarparu gofal o safon. Mae Ffordd hefyd yn creu mwy o gysondeb ledled Cymru, felly gall staff ddisgwyl yr un lefel o gefnogaeth lle bynnag y maent yn gweithio.

Mae Ffordd yn gosod y sylfeini ar gyfer llwybrau cymorth yn y dyfodol i alluogi datblygiad diwylliannau sy'n ddiogel yn seicolegol a gwella cadw staff ar draws y gweithlu iechyd meddwl. Bydd yn parhau i esblygu trwy adborth gan staff i'w gadw'n berthnasol, yn ymarferol ac wedi'i siapio gan brofiad go iawn.

Dywedodd Angie Oliver, Dirprwy Gyfarwyddwr Gweithlu a Datblygu Sefydliadol:

“Mae Ffordd yn adnodd rhagorol sy’n cefnogi’r gweithlu iechyd meddwl ar bob lefel. Mae’n cynnig cefnogaeth lles ymarferol a thosturiol sy’n hawdd ei defnyddio pryd bynnag y bo angen. Mae’n wych ei weld yn fyw ac rydym yn gobeithio y bydd staff yn gweld yr adnoddau’n fuddiol.”

Ewch i wefan AaGIC i ddysgu mwy am Ffordd.