Cofleidio Gweithio Hyblyg: Oes Newydd i GIG Cymru

Cyhoeddedg: 01/10/2025

Bob blwyddyn, mae GIG Cymru yn gweld cydweithwyr gwerthfawr yn gadael eu rolau, eu sefydliadau, ac weithiau'r GIG yn gyfan gwbl oherwydd trefniadau gwaith anhyblyg a diffyg cydbwysedd rhwng bywyd a gwaith, gan greu her yn y GIG y mae'n rhaid i ni ei datrys gyda'n gilydd.

Pam mae Gweithio Hyblyg yn Bwysig

Nid dim ond rhywbeth “braf i’w gael” yw cefnogi cydweithwyr i weithio’n hyblyg, mae’n hanfodol ar gyfer lles cydweithwyr a chynaliadwyedd gwasanaethau. Dangoswyd bod rhoi cyfleoedd i gydweithwyr weithio'n hyblyg yn:

• Gwella bywydau personol a phroffesiynol cydweithwyr
• Galluogi cydbwysedd  rhwng bywyd a gwaith iachach
• Gwella iechyd, lles, boddhad swydd, ymgysylltiad, cymhelliant a morâl
• Hybu ansawdd a chynhyrchiant gwasanaethau a gofal
• Denu, recriwtio a chadw cydweithwyr talentog
• Lleihau salwch ac absenoldeb
• Ehangu ein gweithlu
• Gall gwneud newidiadau i'r ffordd rydym yn ymdrin â gweithio hyblyg chwyldroi'r effaith ar y gofal cyffredinol a ddarperir ledled GIG Cymru.
   

Ymrwymiad Cyffredin

Mae GIG Cymru wedi ymrwymo i hyrwyddo ac annog gwahanol ffyrdd o weithio i ddenu, recriwtio a chadw pobl ragorol.

Mae yna eisoes lawer o enghreifftiau cadarnhaol o weithio hyblyg ar draws GIG Cymru, ond gwyddom fod mwy i'w wneud. Drwy adeiladu ar y sylfeini hyn, gallwn greu diwylliant lle mae hyblygrwydd yn norm, nid yn eithriad, lle gall cydweithwyr ffynnu ac yn y pen draw , aros.

Adnoddau i'ch Cefnogi

 Er mwyn eich helpu a'ch cefnogi i lywio dulliau gweithio hyblyg, mae dau ganllaw newydd wedi'u datblygu:

• Gweithio'n hyblyg: Canllaw unigolyn i weithio'n hyblyg
• Cefnogi Gweithio Hyblyg yn eich tîm

Mae'r canllawiau hyn yn llawn gwybodaeth ac adnoddau ymarferol i helpu unigolion a rheolwyr i gydweithio i ddatblygu trefniadau hyblyg sy'n diwallu anghenion yr unigolyn, y tîm, a'r gwasanaeth. Mae'r ddau ar gael o fewn yr Hwb Cadw Cenedlaethol ar Borth Arweinyddiaeth Gwella AaGIC i Gymru. 
 

Beth sydd yn y Canllawiau?

• Ar gyfer Unigolion: Canllawiau ar sut i ofyn am weithio hyblyg o ddiwrnod cyntaf eich cyflogaeth, waeth beth fo'ch rôl neu radd. Mae'r canllaw yn annog sgyrsiau agored ynglŷn â beth mae hyblygrwydd yn ei olygu i chi, a sut i gydbwyso'ch anghenion chi ag anghenion eich tîm a'ch cleifion.
• Ar gyfer Rheolwyr: Cyngor ymarferol ar gefnogi ceisiadau gweithio hyblyg, gan gynnwys sut i fod yn agored, yn rhagweithiol, ac yn addasadwy wrth sicrhau bod anghenion gwasanaeth yn cael eu diwallu. Mae'r canllaw hefyd yn trafod pwysigrwydd tegwch, tryloywder ac adolygiad rheolaidd o drefniadau hyblyg.

Darganfyddwch Fwy

Archwiliwch y canllawiau newydd a'r ystod lawn o adnoddau ar yr Hwb Cadw Cenedlaethol.

Drwy groesawu gweithio hyblyg, gyda'n gilydd gallwn greu amgylchedd mwy cefnogol a chynhyrchiol i'n holl gydweithwyr, gan sicrhau bod GIG Cymru yn parhau i fod yn lle gwych i weithio, ffynnu ac aros.