Mae AaGIC yn lansio modiwlau hyfforddiant newydd ar amrywiaeth rhywedd ac iechyd trawsrywiol

Bellach gall gweithwyr gofal iechyd proffesiynol gael mynediad at ddau fodiwl hyfforddi ar amrywiaeth rhywedd ac iechyd trawsrywiol, y cyntaf o'u math ar draws GIG Cymru.

Wedi'i lansio gan Addysg a Gwella Iechyd Cymru (AaGIC) yr wythnos hon, mae pob modiwl yn seiliedig ar yr achosion nodweddiadol a allai gyflwyno i feddyg teulu.

Mae'r cyntaf yn ymdrin ag 'Amrywiaeth Rhywedd' a'i nod yw gwella ymwybyddiaeth o iaith, datblygu'r sgiliau i ymgynghori mewn ffordd gadarnhaol a darparu arfer gorau wrth gyffwrdd ag agweddau cyfreithiol ar ofal. Mae'r ail yn canolbwyntio ar 'Iechyd Trawsrywiol' ac yn ymdrin ag ystyriaethau iechyd penodol gan gynnwys cyfundrefnau hormonau sy'n cadarnhau rhywedd, iechyd rhywiol ac atgenhedlu, a sgrinio.

Ysgrifennwyd y modiwlau newydd gan Dr Sophie Quinney, meddyg teulu sydd â diddordeb arbennig mewn iechyd trawsrywedd, gyda chefnogaeth yr academydd, Ben Vincent.

Wrth ddathlu'r lansiad, dywedodd yr Athro Pushpinder Mangat, Cyfarwyddwr Meddygol AaGIC, “Dyma ein modiwlau hyfforddi cyntaf ar gyfer gweithwyr iechyd proffesiynol sy'n ymwneud â gofal pobl trawsrywedd ac anneuaidd. Rydym yn ddiolchgar iawn i Stonewall Cymru am weithio ar y cyd a chefnogi AaGIC gyda'u datblygiad.

Meddygon teulu yn aml yw'r pwynt cyswllt cyntaf i unigolyn sydd angen cefnogaeth.  Er ei fod yn rhan o gwricwlwm Coleg Brenhinol y Meddygon Teulu, nid yw'r pwnc hwn yn aml yn ymddangos yn amserlen hyfforddiant arbenigedd meddygon teulu.

Bydd y modiwlau hyn yn caniatáu i feddygon teulu yng Nghymru wella eu set sgiliau datblygiad proffesiynol wrth gynnig gwasanaeth llawer mwy urddasol, gwell a chadarn i'r cleifion hyn. "

Esbonia Dr Sophie Quinney mai ei phrofiadau ei hun fel meddyg teulu a'i symbylodd i ddatblygu'r hyfforddiant, “Ddwy flynedd yn ôl, roeddwn i'n teimlo'n hollol yn y tywyllwch ynglŷn â'r ffordd orau i gefnogi cleifion trawsrywedd.

Y meddygon teulu sydd yn y pen draw yn dilyn cleifion ar eu taith bontio, felly mae rhywbeth mor syml â galw rhywun wrth ei enw a defnyddio eu rhagenwau yn anfon signal pwerus ein bod ni ar eu hochr ac yn gwrando. ”

Yn ogystal â meddygon teulu mwy gwybodus, mae cleifion trawsrywedd yng Nghymru bellach hefyd yn cael eu cefnogi gan 'Dimau Rhywedd Lleol' sy'n darparu cefnogaeth ragnodi ym mhob bwrdd iechyd lleol. Mae hyn yn golygu nad yw cleifion bellach yn wynebu ansicrwydd ynghylch mynediad at therapi hormonau.

I gael mwy o wybodaeth am y modiwlau newydd 'Amrywiaeth Rhywedd ac Iechyd Trawsrywedd', neu i weld yr holl fodiwlau a gynigir gan AaGIC, ewch i https://gpcpd.heiw.wales/.

Modiwl Amrywiaeth Rhywedd - https://gpcpd.heiw.wales/clinical/gender-diversity/

Modiwl Iechyd Trawsrywedd - https://gpcpd.heiw.wales/clinical/transgender-health