Lansio hyfforddiant Sylfaen Iechyd Meddwl newydd ac Ymwybyddiaeth o Drawma
Mae'n bleser gan Addysg a Gwella Iechyd Cymru (AaGIC) lansio'r cyrsiau Llythrennedd Iechyd Meddwl Sylfaenol (Lefel 1) ac Ymwybyddiaeth o Drawma.
Mae’r cyrsiau wedi’u creu mewn cydweithrediad ag amrywiaeth o randdeiliaid iechyd meddwl ar draws sectorau gan gynnwys:
- gofal iechyd
- gofal cymdeithasol
- y sector gwirfoddol
I’r perwyl hwnnw, mae’r cwrs wedi’i gynllunio i helpu’r holl staff sy’n gweithio gyda phobl ac a fyddai’n gwerthfawrogi rhywfaint o wybodaeth ychwanegol am iechyd meddwl a thrawma.
Nod y cwrs yw meithrin dealltwriaeth sylfaenol o iechyd meddwl a thrawma, gan gynnwys:
- adnabod cyflyrau iechyd meddwl a sut y gallant effeithio ar bobl
- codi ymwybyddiaeth am stigma o fewn iechyd meddwl
- y dirwedd y tu ôl i hunanladdiad a hunan-niweidio
- sut i ymdrin â sgyrsiau anodd sy'n ymwneud ag iechyd meddwl
- ymwybyddiaeth o drawma ar bob oedran a sut mae'n effeithio ar fywydau pobl
- ystadegau am iechyd meddwl yng Nghymru.
Mae'r cyrsiau wedi'u cynllunio i helpu staff i deimlo'n fwy gwybodus am iechyd meddwl ac yn fwy cyfforddus wrth siarad â phobl am eu sefyllfaoedd.
Ar ôl cwblhau'r cyrsiau, dylai staff deimlo'n fwy parod i helpu i gefnogi pobl, eu cyfeirio at adnoddau a gwasanaethau a rhoi cyngor priodol wrth ymdrin ag iechyd meddwl.
Ewch i dudalen we Cynllun Gweithlu Iechyd Meddwl Strategol Y Tŷ Dysgu i gael rhagor o wybodaeth am hyfforddiant iechyd meddwl yng Nghymru.