Addysg a Gwella Iechyd Cymru yn arwain y ffordd i wella mynediad cyfathrebu i bobl anabl yng Nghymru

Addysg a Gwella Iechyd Cymru (AaGIC) yw'r sefydliad cyntaf yng Nghymru sydd wedi ymrwymo i fabwysiadu'r symbol a'r safonau mynediad cyfathrebu er mwyn gwella bywydau pobl sy'n byw gydag anableddau cyfathrebu.

Tra bod y symbol mynediad i gadeiriau olwyn yn cael ei gydnabod yn gyffredinol, yn ogystal â'r symbolau ar gyfer nam ar y clyw a'r golwg, hyd 2018 nid oedd unrhyw symbol ar gyfer mynediad cyfathrebu.

Mae Communication Access UK, partneriaeth rhwng elusennau a sefydliadau cenedlaethol * sy'n gweithio i roi llais i bobl sy'n byw gydag anableddau cyfathrebu, wedi datblygu symbol newydd a set o safonau cysylltiedig i wella mynediad i gyfathrebu.

Mae hyd at 20% o boblogaeth y DU yn profi anhawster cyfathrebu ar ryw adeg yn ystod eu bywydau. Gallai'r anawsterau hyn gynnwys anawsterau lleferydd, ei chael hi'n anodd gofyn cwestiwn neu ofyn am help, neu anawsterau wrth ddarllen, ysgrifennu a phrosesu gwybodaeth. 

Fel mabwysiadwr cynnar o'r safonau mynediad cyfathrebu a'r symbol, mae AaGIC yn helpu i lywio'r prosiect wrth iddo gael ei gyflwyno'n raddol ledled y DU drwy arwain y ffordd yng Nghymru.

Darperir hyfforddiant wyneb yn wyneb i staff AaGIC a gynlluniwyd i ategu'r broses o weithredu'r safonau.

I gefnogi'r rhai sydd ag anghenion cyfathrebu, bydd staff yn dysgu sut i; sicrhau bod amgylcheddau ffisegol yn cael eu haddasu, sicrhau bod gwybodaeth ar lafar ac yn ysgrifenedig ar gael mewn nifer o fformatau hygyrch, ystyried mynediad i gyfathrebu ar ddechrau cynllunio unrhyw fentrau neu adnoddau, a darparu amser priodol ar gyfer cyfathrebu a phrosesu gwybodaeth. 

Yn dilyn yr hyfforddiant hwn, bydd AaGIC yn arddangos y symbol yn ei swyddfeydd i ddangos bod gan staff yr offer i gefnogi anghenion pobl ag anableddau cyfathrebu.

Dywedodd Alex Howells, Prif Weithredwr AaGIC: "Rydym yn falch iawn mai ni yw'r sefydliad cyntaf yng Nghymru sydd wedi ymrwymo i fabwysiadu'r symbol a'r safonau i gefnogi'r rheini sy'n byw gydag anableddau cyfathrebu er mwyn sicrhau mynediad a chyfle cyfartal.

"Drwy godi ymwybyddiaeth, darparu hyfforddiant i'n staff, a thrwy gyflwyno'r symbol mynediad cyfathrebu newydd, gobeithiwn gynyddu hyder ac annibyniaeth y rhai sy'n byw gydag anawsterau cyfathrebu.”

*Mae Mynediad Cyfathrebu i'r DU yn bartneriaeth rhwng Coleg Brenhinol y Therapyddion Iaith a Lleferydd, Headway, Communication Matters, Cymdeithas Strôc, Hawliau Anabledd y DU, Fforwm Anabledd Busnes, Cymdeithas Clefyd Niwronau Motor a'r Rhwydwaith Genedlaethol o Fforymau Rhieni Gofalwyr.