Dylai unigolion sy'n dymuno ymgymryd ag un neu fwy o'r pedair rôl hyfforddi gydnabyddedig fod yn feddygon sydd wedi mynegi diddordeb clir mewn hyfforddi, asesu a datblygu myfyrwyr meddygol is-raddedig a/neu hyfforddeion meddygol ôl-raddedig.
Mae’n rhaid i unigolion fod yn barod i ymrwymo i gael eu hadnabod fel hyfforddwyr, cyflawni eu cyfrifoldebau fel hyfforddwyr o dan y cytundeb hwn a gwneud eu hunain yn broffesiynol yn rôl yr hyfforddwr drwy ymrwymo i ymgymryd â datblygiad proffesiynol perthnasol ac ymgysylltu ag arfarnu rôl yr hyfforddwr.
Er mwyn cyflawni cyfrifoldebau rôl hyfforddwr, dylai fod gan unigolion hefyd wybodaeth a dealltwriaeth gadarn o egwyddorion cydraddoldeb ac amrywiaeth a gweithredu’n unol â hynny wrth gyflawni eu cyfrifoldebau fel hyfforddwyr.
Mae rolau hyfforddwyr israddedig a nodwyd gan y trefnwyr addysg fel rhai sy'n mapio i ddiffiniadau'r Cyngor Meddygol Cyffredinol (GMC) fel arfer yn benodiadau ffurfiol gyda manylebau person a gofynion cysylltiedig, ac mae'r rhain yn cael eu hasesu yn ystod y broses recriwtio berthnasol.
Mae’r tabl isod yn dangos pwy sy’n gymwys i ymgymryd â’r pedair rôl hyfforddi yng Nghymru :
Addysg is-raddedig | Addysg ôl-raddedig | |||
---|---|---|---|---|
Yn gyfrifol am oruchwylio cynnydd myfyrwyr | Prif gydlynydd | Goruchwyliwr addysgol | Goruchwyliwr clinigol a enwir | |
Meddyg Ymgynghorol Parhaol | cymwys | cymwys | ar gyfer hyfforddeion Sylfaen, Craidd ac Uwch | ar gyfer hyfforddeion Sylfaen, Craidd ac Uwch |
Ymgynghorydd Meddygol Locwm | ddim yn gymwys | ddim yn gymwys | ddim yn gymwys | ddim yn gymwys |
Meddyg Teulu | cymwys | cymwys | ddim yn gymwys | ddim yn gymwys |
Meddyg Teulu Locwm | ddim yn gymwys | ddim yn gymwys | ddim yn gymwys | ddim yn gymwys |
Graddfa staff, arbenigwr Cyswllt neu feddyg arbenigol (SAS) gyda Thystysgrif Cwblhau Hyfforddiant (CCT) | cymwys | cymwys | ar gyfer hyfforddeion Sylfaen, Craidd ac Uwch | ar gyfer hyfforddeion Sylfaen, Craidd ac Uwch |
Meddyg SAS heb CCT | cymwys | ddim yn gymwys | ar gyfer hyfforddeion sylfaen a chraidd yn unig | ar gyfer hyfforddeion sylfaen a chraidd yn unig |
Mae canllawiau’r GMC ac Addysg a Gwella Iechyd Cymru (AaGIC) yn glir na fydd ymgynghorwyr meddygol locwm fel arfer yn gymwys i ymgymryd â rolau goruchwyliwr addysgol na’r goruchwyliwr clinigol penodol. Y rheswm am hynny, yn gyffredinol, yw bod swyddi locwm yn fyr, felly ni fyddai unigolion yn gallu cynnig parhad yn y gefnogaeth a’r oruchwyliaeth i hyfforddeion.
Serch hynny, mae'n bosib gwneud eithriadau, yn dibynnu ar amgylchiadau unigol (e.e. os yw unigolyn wedi bod ac yn disgwyl bod mewn swydd locwm am gyfnod hirach o amser). Am wybodaeth bellach ynglŷn â phroses eithriadau locwm, e-bostiwch Uned Ansawdd Addysg a Gwella Iechyd Cymru.
Parhewch am wybodaeth ynglŷn â sut i ddod yn hyfforddwr yng Nghymru.