Hyfforddiant uwch seiciatreg plant a'r glasoed

Cyflwyniad

Mae seiciatreg plant a’r glasoed (CAMHS) yn is-arbenigedd o seiciatreg sy’n canolbwyntio ar iechyd meddwl plant a’r glasoed. Mae hyfforddeion arbenigol ar y rhaglen yn gallu cymryd rhan mewn amrywiaeth eang o brofiadau strwythuredig, clinigol ac addysgol sy’n cynnwys hyfforddiant ar lawr gwlad mewn meysydd arbenigol amrywiol, megis:

• Seiciatreg Niwro-ddatblygiadol
• Ymyrraeth gynnar mewn seicosis
• Seiciatreg Argyfwng a Chyswllt
• Anhwylderau bwyta
• Gwasanaethau Fforensig a Ymgynghori Phobl Ifanc Fforensig
• Defnydd o Gyffuriau ac Alcohol
• Anabledd dysgu
• Timau Triniaeth Gartref Dwys yn y Gymuned

Mae pob hyfforddai hefyd yn treulio 6 mis mewn uned cleifion mewnol CAMHS.

Hyfforddi yng Nghymru

Mae hyfforddiant CAMHS yng Nghymru yn ymfalchïo mewn darparu cyfleoedd hyfforddi sy'n rhychwantu'r cwricwlwm ar draws CAMHS generig ac is-arbenigeddau. Mae hyfforddeion hefyd yn cael y cyfle i ennill profiad mewn seicoffarmacoleg, hyfforddiant therapi seicolegol, cyfleoedd addysg feddygol, a hyfforddiant rôl arweinyddiaeth a rheolaeth, sy'n cydfodoli ochr yn ochr â phrofiadau hyfforddiant clinigol. 

Mae gan y rhaglen hyfforddi gysylltiadau agos ag adran Seiciatreg Plant a’r Glasoed yn Ysgol Feddygaeth Prifysgol Caerdydd, sy’n cael ei harwain gan yr Athro Anita Thapar. O ganlyniad, mae hyfforddeion yn elwa o’r amgylchedd ymchwil cryf a chyfleoedd lluosog i addysgu myfyrwyr meddygol. Rydym hefyd yn cynnal cysylltiadau agos â chwrs MRCPsych (Aelod o Goleg Brenhinol y Seiciatryddion) ac mae cyfleoedd i addysgu meddygon ôl-raddedig dan hyfforddiant.

Mae'r cynllun wedi'i leoli yng ngogledd a de Cymru. Mae'r rhan fwyaf o hyfforddeion yn aros yn yr ardal ddaearyddol y maent yn dechrau eu hyfforddiant ynddi, ond mae cyfle i symud ar draws rhanbarthau Cymru os yw hyfforddai'n dymuno gwneud hynny. Mae'r cynllun hefyd yn cwmpasu ardal sydd â phoblogaeth ethnig ac economaidd amrywiol, gan ganiatáu i hyfforddeion gael profiad o weithio gyda phlant a theuluoedd o amrywiaeth eang o gefndiroedd cymdeithasol a diwylliannol.

Mae gennym hanes sefydledig o hyfforddiant llwyddiannus mewn CAMHS ac mae hyfforddeion yn elwa ar amgylchedd colegol a chyfeillgar cryf.  Bydd lleoliadau hyfforddi yn cael eu cynllunio gyda chi dros gyfnod o dair blynedd gyda Chyfarwyddwr y Rhaglen Hyfforddi, er mwyn eich galluogi i gael y cyfle gorau posibl i ennill eich Tystysgrif Cwblhau Hyfforddiant (TCC). Mae rhaglen addysgu academaidd wedi’i diogelu sy’n rhedeg am dri diwrnod ar hugain y flwyddyn a gefnogir gan feddygon ymgynghorol ac uwch staff CAMHS ledled Cymru.

Goruchwylir y cynllun gan Gyfarwyddwr Rhaglen Hyfforddi (gweler rhagor o wybodaeth isod am fanylion cyswllt). Dyrennir goruchwyliwr addysgol i bob hyfforddai sy'n goruchwylio ei hyfforddiant ac yn cyfarfod â nhw bob tymor. Mae goruchwylwyr addysgol yn cefnogi hyfforddeion i nodi a chyflawni amcanion dysgu a sicrhau eu bod yn bodloni anghenion y cwricwlwm erbyn diwedd eu hyfforddiant. Yn ogystal, bydd gan hyfforddeion oruchwyliwr clinigol ar gyfer pob swydd.