Mae hyfforddiant arbenigol mewn meddygaeth liniarol yng Nghymru’n cynnwys profiad hyfforddi cynhwysfawr i’r sawl sy’n dymuno dilyn gyrfa hyd lefel Ymgynghorydd.
Ceir profiad o ofal lliniarol arbenigol i gleifion mewnol ar draws y cylchdro. Mae hyn yn cynnwys profiad yn y Ganolfan Oncoleg Ranbarthol yn Ysbyty Felindre a gyda’r tîm gofal lliniarol ysbyty yn Ysbyty Athrofaol Cymru. Ceir profiad ysbyty hefyd yn ysbytai Abertawe yn ystod cyfnod yn Nhŷ Olwen.
Mae meddygaeth liniarol yn arbenigedd cymharol newydd a gafodd ei gydnabod gyntaf fel arbenigedd gan Goleg Brenhinol y Meddygon yn 1987. Mae wedi parhau i dyfu o ran maint a dylanwad ers hynny. Wedi deillio’n wreiddiol o’r angen i wella ansawdd bywyd i bobl â chanser datblygedig ac mae ei wreiddiau yn y mudiad hosbis, mae’r arbenigedd yn gynyddol berthnasol i unrhyw glaf â salwch datblygedig, cynyddol sydd angen mewnbwn arbenigol i wella ansawdd eu bywyd. Cymeradwywyd hyn yn ystod y blynyddoedd diwethaf yn sgil cyhoeddi sawl Fframwaith Gwasanaeth Cenedlaethol, fel Meddygaeth Arennol, Cyflyrau Tymor Hir a Chardioleg. Disgrifir ei le o fewn rheoli canser mewn manylder yng Nghanllaw NICE “Improving Supportive and Palliative Care for Adults with Cancer, 2004.”
Mae natur gyfannol meddygaeth liniarol yn cynnwys parthau corfforol, seicogymdeithasol a/neu ysbrydol gofal ac oherwydd, mae gweithio amlbroffesiwn da yn hanfodol i’w llwyddiant. Mae gofal lliniarol yn cael ei ddarparu mewn amrywiaeth o leoliadau, gan gynnwys hosbisau, unedol gofal lliniarol, mewn ysbytai ac yn y gymuned. Mae llawer o wasanaethau hosbis i gleifion mewnol a chymunedol yng ngofal y sector elusennol, gyda chefnogaeth y GIG. Mae meddygon yn gysylltiedig â rheolaeth uniongyrchol cleifion mewnol ac allanol hosbisau ac maent fel arfer yn gweithredu fel cynghorwyr mewn timau ysbyty a chymunedol. Mae darparu addysg a hyfforddiant i amrywiaeth o grwpiau proffesiynol i wella safon gofal lliniarol cyffredinol yn digwydd ochr yn ochr â darpariaeth uniongyrchol gwasanaethau arbenigol.
Oherwydd natur eu gwaith, mae meddygon meddygaeth liniarol yn mwynhau perthynas waith agos ag amrywiaeth o gydweithwyr gan gynnwys rhai mewn practis cyffredinol, oncoleg feddygol a chlinigol ac arbenigeddau meddygol a llawfeddygol eraill.
Gall meddygaeth liniarol fod yn foddhaus iawn gyda chymysgedd dda o waith clinigol a chyfleoedd i ddibynnu ar sgiliau a chrebwyll clinigol datblygedig iawn. Mae’n arbenigedd ifanc gyda heriau a chyfleoedd newydd ar gyfer gyrfa amrywiol a newidiol.
Ceir ymdeimlad o gyflawniad drwy bennu nodau gofal realistig gyda chleifion a gofalwyr i wella ansawdd bywyd. Mae amser i roi gofal cyfannol wedi’i ymgorffori yn y gwaith ac mae hynny’n cael ei werthfawrogi gan gleifion a staff fel ei gilydd. Mae cydweithio’n effeithiol fel tîm gydag amrediad eang o gydweithwyr arbenigol yn creu amgylchedd gweithio cefnogol. Mae cyfle i weithio mewn amrywiaeth o leoliadau yn ystod yr hyfforddiant, Mae swyddi ymgynghorol yn amrywiol o ran eu strwythur gyda’r posibilrwydd o ddatblygu diddordebau arbennig. Mae dylanwadu ar y ddarpariaeth gofal lliniarol ar draws y gymuned iechyd ehangach drwy addysgu, hyfforddiant a datblygu gwasanaethau yn rhoi boddhad mawr i’r swydd.
No matching content found.