Neidio i'r prif gynnwy

Gogledd Cymru

Mae Blwyddyn Sylfaen Ddeintyddol Gogledd Cymru yn gynllun sefydledig gyda’i gymeriad unigryw ei hun. Fe’i sefydlwyd ym 1989, ac mae wedi bod yn boblogaidd iawn gyda hyfforddeion dros y blynyddoedd ac wedi lansio llawer o yrfaoedd llwyddiannus.

Mae Gogledd Cymru yn enwog am ei golygfeydd arfordirol deniadol, ei thirwedd mynyddig a’i safleoedd hanesyddol. Mae cyfleoedd lawer ar gael ar gyfer gweithgareddau awyr agored gan gynnwys dringo, cerdded, canŵio a hwylio. Mae’r Ganolfan Chwaraeon Dŵr Genedlaethol ym Mhlas Menai ger Caernarfon ac mae’r Ganolfan Fynydda Genedlaethol, Plas y Brenin, yng Nghapel Curig. Mae cysylltiadau trafnidiaeth rhagorol i Gaer, Lerpwl, Manceinion a Dulyn.

Mae'r cynllun ei hun wedi'i leoli dros ddau safle, yn Ysbyty Glan Clwyd, Bodelwyddan, ger Y Rhyl ar brif gefnffordd yr A55 i Ogledd Cymru o Sefydliad Meddygol Caer a Wrecsam, sydd wrth ymyl Ysbyty Maelor. Mae gan y canolfannau ôl-raddedig enw da am gyfeillgarwch, a byddwch yn dod o hyd i awyrgylch cefnogol iawn gan holl staff y ganolfan ac ymgynghorwyr ysbytai

Mae gan Ysbyty Glan Clwyd a Sefydliad Meddygol Wrecsam gyfleusterau rhagorol gyda llyfrgelloedd helaeth, ystafelloedd TG ac ystafelloedd hyfforddi ymarferol pwrpasol

Mantais mwyaf y cynllun yw profiad y Goruchwylwyr Addysg a'u practisau o ansawdd uchel. Mae ein cynllun yn cynnig cyfleoedd mewn practisau gwledig, o ardaloedd fel Ynys Môn yn y Gogledd Orllewin, i lawr i Ddolgellau yng Ngwynedd. Fel arall, mae practisau trefol yn agosach at Wrecsam, Yr Wyddgrug, a'r ffin ger Caer.

Mae’r rhan fwyaf o Oruchwylwyr Addysg wedi bod yn croesawu deintyddion ifanc i’w practis ers blynyddoedd lawer ac mae eu timau’n aml yn cynnwys cyn hyfforddeion (sydd bellach yn edrych yn llawer hŷn!). Mae eu timau proffesiynol yn brofiadol iawn o ran sicrhau y bydd eich blwyddyn gyntaf yn gofiadwy, yn ddiogel ac yn bleserus. Ym mhob practis hyfforddi, fe’ch anogir i ddarparu gofal deintyddol o’r safon uchaf. Ceir cyfleoedd i fynychu cyrsiau pellach a drefnir gan y Ddeoniaeth yng Ngogledd Cymru a mynd i glinigau Ymgynghorol lle bo hynny’n briodol.

Mae Cyfarwyddwr Rhaglen Hyfforddi’r (TPD)  cynllun, Michael Strother, wedi gweithio mewn ymarfer cyffredinol y GIG yng Nghilgwri ac yn Lerpwl cyn symud i Ogledd Cymru yn 2020. Ar hyn o bryd mae Michael yn gweithio yn Conwy mewn practis GIG / Preifat cymysg ac roedd yn Oruchwyliwr Addysg cyn ymgymryd â’r rôl fel Cyfarwyddwr y Rhaglen Hyfforddi ar gyfer cynllun DFT Gogledd Cymru ym mis Awst 2024. Mae hefyd yn Ysgrifennydd y  Pwyllgor Deintyddol Lleol Gogledd Cymru

Mae'r Rhaglen Diwrnod Astudio ei hun yn amrywiol iawn gyda dysgu grwpiau bach a  sesiynau ymarferol. Fe'ch anogir i ystyried ein cynllun hyfforddi ail flwyddyn (Hyfforddiant Craidd Deintyddol DCT1), a leolir yn Ysbyty Glan Clwyd.

Os oes gennych chi ddiddordeb, os ydych yn frwdfrydig, gyda’r awydd i barhau â’ch hyfforddiant mewn amgylchedd addysgol cwbl gefnogol a chyfeillgar, mewn ardal sydd ag amrywiaeth o gyfleusterau a chyfleoedd, byddem wrth ein bodd yn cwrdd â chi.

Gwyliwch y fideo isod i weld hyfforddai blaenorol ar gynllun Gogledd Cymru yn trafod ei brofiad.

 

Cysylltu: