Grŵp adolygu cymheiriaid
Trosolwg o becyn cymorth grŵp cymheiriaid deintyddol
Cyflwyniad
Mae grwpiau cymheiriaid yn rhoi cyfle i grwpiau o ddeintyddion a gweithwyr proffesiynol ym maes gofal deintyddol adolygu agweddau ar ymarfer.
Mae gweithgareddau adolygu cymheiriaid yn cael eu hystyried yn rhan o ddatblygiad proffesiynol parhaus gorfodol pob gweithiwr deintyddol proffesiynol. Mae’n ofynnol i bob gweithiwr deintyddol proffesiynol cofrestredig gwblhau DPP er mwyn cynnal eu cofrestriad. Mae’r Cyngor Deintyddol Cyffredinol (CDC) yn ei gwneud yn ofynnol i bob cofrestrai gadw cofnod ysgrifenedig o weithgarwch DPP, a dangos y cofnod hwn os gofynnir am hynny. Bydd defnyddio’r fframwaith adolygu cymheiriaid hwn yn darparu DPP gwiriadwy sy’n bodloni gofynion cynllun DPP y CDC yn achos y rheini sy’n ymgysylltu’n llawn ac yn cymryd rhan.
Nod adolygiad gan gymheiriaid yw rhannu profiadau a nodi meysydd lle gellir gwneud newidiadau gyda’r nod o wella ansawdd y gwasanaeth a gynigir i gleifion. Mater i weithwyr proffesiynol ym maes deintyddiaeth yw cymryd yr awenau wrth gysylltu â’u cyfoedion mewn deintyddfeydd eraill i ffurfio grŵp adolygu cymheiriaid. Dylai un gweithiwr deintyddol proffesiynol weithredu fel Trefnydd y grŵp.
Y canlyniad disgwyliedig i gyfarfodydd grŵp adolygu cymheiriaid yw gwelliant cynaliadwy mewn gofal a gwasanaeth deintyddol i gleifion.
Yn 2018, comisiynodd y CDC adolygiad o’r llenyddiaeth ar CPD.
Mae’r adroddiad yn crybwyll sawl cyfeiriad at fanteision dysgu drwy adolygu cymheiriaid. Crynhoir y prif bwyntiau yma;
- Mae sawl math o ddysgu gan gymheiriaid gan gynnwys adolygu gan gymheiriaid, cymorth gan gymheiriaid, adborth gan gymheiriaid, arsylwi gan gymheiriaid, archwilio gan gymheiriaid, grwpiau trafod gan gymheiriaid, rhyngweithio â chyfoedion, mentora cyfoedion a hyfforddi a defnyddio hwyluswyr cymheiriaid
- Mae dysgu gan gyfoedion yn hwyluso rhannu arferion gorau ac yn hyrwyddo safonau ymarfer uchel a all fod yn arbennig o werthfawr i ymarferwyr unigol. Nodwyd bod cydweithio a rhyngweithio yn fuddiol ac yn fwy tebygol o arwain at newidiadau cadarnhaol mewn ymarfer
- Yn ogystal, mae’n cefnogi ymarfer adfyfyriol ac mae adnabod anghenion dysgu a’i werth o ran cefnogaeth fugeiliol hefyd yn cael ei gydnabod.
- Gall dysgu gan gymheiriaid gefnogi rhyngweithio rhwng gweithwyr proffesiynol ar bob lefel o arbenigedd. Gall grwpiau adolygu gan gymheiriaid wella cyfathrebu, dysgu ac ymgysylltu rhwng gweithwyr proffesiynol a rhyngasiantaethol. Maent hefyd yn cryfhau perthnasoedd ac yn hybu cyd-ddealltwriaeth.
Manteision grwpiau cymheiriaid:
- dull o rannu gwybodaeth rhwng cydweithwyr
- ysgogiad ar gyfer dysgu unigol
- arf i newid a gwella perfformiad
- cyfrwng i gefnogi gweithwyr proffesiynol deintyddol sy’n tanberfformio
- dull o gefnogi gweithgareddau ymarfer dyddiol
- dull o gytuno ar safonau clinigol ar gyfer archwiliad clinigol
- cyfrwng i wella cyfathrebu a meithrin cysylltiadau rhwng deintyddfeydd lleol.
I fanteisio i’r eithaf ar ddysgu gan gymheiriaid, dylai pob aelod wneud yr ymrwymiadau canlynol i’r grŵp cyfoedion:
- bod yn barod i fod yn rhan o grŵp cymheiriaid
- bod yn barod i fynychu pob cyfarfod neu gynifer ag y bo modd
- bod yn barod i adolygu agweddau ar eu hymarfer eu hunain a rhannu'r wybodaeth honno
- bod yn barodi roi newidiadau ar waith yn eu practis eu hunain er mwyn gwella ansawdd y gwasanaeth a gynigir i gleifion.
Templedi a awgrymir:
- Cofrestr bresenoldeb
- Agenda
- Cofnod cryno o’r cyfarfod
- Taflen werthuso ar gyfer cynrychiolwyr
- Log dysgu adfyfyriol
Bydd swyddog gwella ansawdd deintyddol Addysg a Gwella Iechyd Cymru (AaGIC) yn anfon templedi atoch ar gyfer yr uchod i gyd.
Os oes gennych chi unrhyw gwestiynau am sefydlu eich grŵp adolygu cymheiriaid, cysylltwch â’ch tiwtor gwella ansawdd lleol neu os oes gennych chi ymholiadau cyffredinol, cysylltwch â HEIW.DentalQI@wales.nhs.uk.
Cyfeiriadau: